Almaty mańyndaǵy Baıserke aýylynda bolǵan atystyń mán-jaıy belgili boldy, dep habarlaıdy Egemen.kz Almaty telearnasyna silteme jasap.
Telearna málimetinshe, janjal "Polıana 1B" demalys ornynda bolǵan. Kýágerlerdiń aıtýynsha, oq atqandar men keshen ıesiniń arasynda jeke máseleler bolǵan. Janjaldy demalýshylardyń biri vıdeoǵa túsirgen. Rolık avtory oq daýysyn estigennen keıin kamera qosqanyn aıtty.
Basqa kýágerlerdiń aıtýynsha, olar medısınalyq maska kıgen bir top adamnyń demalys keshenine kirgenin kórgen. Olar keshenniń ıesin izdep kelgen jáne janjaldasqannan keıin oq atqan.
"Qatty jarylys boldy, shamamen tórt ret. Sosyn men demalyp otyrǵan adamdardyń kete bastaǵanyn kórdim. Olar qorqyp ketti. Jarylys boldy degen qaýeset shyqty, biraq men qatelesippin. Ol jerde adam óltirilgen shyǵar", dedi Ile aýdanynyń turǵyny Leonıd Pronıýkov.
Jergilikti turǵyndar demalys ornynda mundaı jaǵdaı eshqashan bolmaǵanyn atap ótti. Olardyń aıtýynsha, keshenniń ıesi jaqsy adam jáne onyń jaýy bolǵan emes. Sondaı-aq sportpen shuǵyldanamyn degen kez kelgen adam úshin keshen árdaıym ashyq bolǵan. Al jumys kúnderi kirý tegin. Biraq qazirgi jaǵdaıǵa baılanysty demalys orny jabyq - esikte úlken qulyp tur jáne qaraýyldap ıt jatyr.