Májilis Tóraǵasy Nurlan Nyǵmatýlın Aýstrııa Respýblıkasy Ulttyq Keńesiniń Tóraǵasy Volfgang Sobotkaǵa jáne Aýǵanstan Islam Respýblıkasy Parlamenti Volesı Djırgasynyń Tóraǵasy Mır Rahman Rahmanıǵa lańkestik shabýyl saldarynan adamdardyń qaza bolýyna baılanysty kóńil aıtý jedelhatyn joldady, dep habarlaıdy Egemen.kz.
Qazaqstan Respýblıkasy Parlamenti Májilisiniń Tóraǵasy Nurlan Nyǵmatýlın óziniń jáne Palata depýtattarynyń atynan Vena qalasynda jáne Qabyl ýnıversıtetinde jasalǵan lańkestik shabýyl saldarynan qaza tapqandardyń otbastaryna orny tolmas aýyr qaıǵyǵa ortaqtasyp, kóńil aıtty.
Sonymen qatar Nurlan Nyǵmatýlın Aýstrııa men Aýǵanstan halqyna sabyrlylyq pen tózimdilik tilep, zardap shekkenderdiń tezirek saýyǵýyna tilektestik bildirdi.