"Eńbek resýrstaryn damytý ortalyǵy" AQ saıtynda testilik rejımde elimizdiń áleýmettik-eńbek salasynyń negizgi kórsetkishteri beriletin iac.enbek.kz dashbordy iske qosyldy, dep habarlaıdy Egemen.kz.
Dashbord halyqty jumyspen qamtý, eńbek, kóshi-qon jáne áleýmettik qamtamasyz etý boıynsha ózekti statıstıkalyq derekterdi kórsetedi, olar Ulttyq statıstıka bıýrosynyń, QR Eńbek jáne áleýmettik qorǵaý mınıstrliginiń aqparattyq júıeleriniń, sondaı-aq Elektrondyq eńbek bırjasynyń (enbek.kz) derekteri negizinde únemi jańartylyp otyrady.
Dashbordty iske qosýdyń negizgi maqsaty ashyqtyqty arttyrý, eńbek naryǵy men áleýmettik sala týraly biregeı aqparatqa qol jetkizýdi jeńildetý bolyp tabylady.
«Memleket basshysy Qasym-Jomart Toqaev jyl saıynǵy Qazaqstan halqyna Joldaýynda: «Aqparattyń ashyqtyǵy azamattardyń keń aýqymyn memlekettik saıasat sharalaryn iske asyrý prosesine tartýdyń kepili bolyp tabylady»,-dep atap ótken bolatyn. Ashyqtyq pen qoǵamǵa esep berýdi qamtamasyz etý – bul memlekettik organdar men kvazımemlekettik sektor qyzmetindegi basymdyq. Osyǵan baılanysty, Eńbek jáne áleýmettik qamtamasyz etý naryǵy týraly aqparattyń bastapqy kózi retinde ERDO áleýmettik-eńbek salasy boıynsha ózekti jáne naqty aqparatty qamtamasyz etýdi óz aldyna mindet qoıady», – dep atap ótti ERDO basshysy Dáýlet Arǵyndyqov.
Panelde statıkalyq kórsetkishter ǵana emes, aldyńǵy kezeńmen salystyrǵanda olardyń dınamıkasy da kórsetiledi. Sondaı-aq, paıdalanýshylarǵa derekterdi odan ári paıdalaný úshin sońǵy 5 jyldaǵy dınamıkamen biriktire júkteý múmkindigi beriledi.
«Sapaly jáne senimdi derekter zertteýler júrgizý, gıpotezalardy rastaý, sheshimder qabyldaý prosesi, elimizdegi aǵymdaǵy jaǵdaıdy baǵalaý úshin negiz bolyp tabylady. Aqparatqa shekteýli qol jetimdilik buǵan kedergi keltirýi múmkin. Sondyqtan biz ERDO saıtynda BAQ, sarapshylar qaýymdastyǵy jáne qarapaıym azamattar úshin yńǵaıly aqparat kózi bolýy tıis dashbord qurdyq. Biz odan ári onyń «paıdalanýǵa jaramdylyǵyn» qamtamasyz etý úshin paıdalanýshylardyń qajettilikterine qaraı qarqyndy jumys isteýdi jáne jetildirýdi jalǵastyramyz», – dep atap ótti ERDO Strategııa jáne jobalyq basqarý departamentiniń dırektory Aleksandra Molchanovskaıa.
ERDO sarapshylardy, taldaýshylardy jáne basqa da múddeli azamattardy dashbordtyń testilik nusqasyn jetildirýge qatysýǵa shaqyrady. Servısti jaqsartý boıynsha pikirler men tilekterdi e-mail: a.molchanovskaya@enbek.kz poshtasyna jiberýge bolady.