6 jáne 7 qarashada "Astana Balet" teatrynda qazaqstandyq horeograf Anvara Sadyqova qoıǵan "Jeltorańǵy týraly ańyz" bir aktili baletiniń premerasy ótedi, dep habarlaıdy Egemen.kz.
«Kórip turǵanymyzdaı, osy kúni bul taqyryp ózekti bolyp tur. Biz – adam men tabıǵat arasyndaǵy úndestikti tabýǵa umtylamyz. Tamyry tereń boılaǵan jeltorańǵy aǵashynyń ózi tabandylyq pen kúsh-qýattyń beınesindeı. Ol túrli qıyndyqtarǵa tótep berip keledi. Osy qasıet bizdiń halqymyzǵa da tán: talaı qıyn-qystaý kezeńdi basynan ótkergen elimiz kúsh jınap, alǵa qaraı umtylyp keledi», – deıdi horeograf Anvara Sadyqova.
Balet lıbrettosyn áıgili aqyn Baqyt Qaıyrbekov jazǵan. Spektakldiń ár kórinisi fılosofııalyq mazmunǵa ıe, al, beınelerdiń ishki tereńdigi men syrtqy sulýlyǵy aıqyn.
«Baletti shyǵarýyma Qýat Shildebaevtyń «Torańǵy muńy» atty ǵajaıyp týyndysy túrtki boldy. Kompozıtordyń mýzykalyq shyǵarmalary belgili bir oı men ıdeıaǵa jetelep, túrli kúıge bóleıdi. Munda muń, zar men saǵynysh bolǵanymen, barshamyz qol úzbeýimiz tıis úmit sáýlesi de bar… Biz ár beıneni qazaq mýzykalyq aspaptarynyń tereń mazmundy áýezin sýretteıtin plastıkalyq tilmen sıpattaýǵa tyrystyq. Mysaly, qobyz. Onyń saryny jeldiń kúshimen dalany kezedi», – dep atap ótti Anvara Sadyqova.
Baletmeısterdiń aıtýynsha, balettiń horeografııasy klassıkalyq bı men qazaq bıiniń úılesimdiliginen quralǵan. Ulttyq horeografııanyń stıli balet spektakliniń túrli beınelerin sýretteýde keńinen qoldanyldy.
«Anvaranyń horeografııalyq týyndylarynda qazaq ulttyq horeografııasynyń zamanaýı formasy, zamanaýı sıpaty esip turady. Onyń kótergen ıdeıalary, tańdaǵan taqyryptary adamzatqa ortaq bolǵandyqtan, kórermender men bıshilerge de erekshe áser etedi. Repetısııa zalynda Anvara elgezek ári óte zerdeli. Ol ártistermen birge shyǵarmashylyq jasaýǵa ashyq», - dep atap ótti, jetekshi solıst Dılara Shomaeva.
Baletti kórermenniń qabyldaýynda spektakldiń kórkemdik bezendirilýi de aıtarlyqtaı mańyzǵa ıe: dekorasııa, kostıýmder, jaryq – osynyń bári «Astana Balet» teatry sheberleriniń kúshimen jasalady. Kostıým sýretshisi Natalıa Protasovanyń aıtýynsha, kostıýmderdi jasaǵanda ol shynaıy tabıǵı beınelerge kóńil aýdaryp, torańǵy toǵaılaryndaǵy aǵashtar men qustardyń kelbetin balet kostıýmderine ıkemdegen.
«Adam balasy ne istesem de óz erkim, dep oılaıdy. Biraq, bul qate. Osy eki álem arasyndaǵy qaqtyǵysty kórsetý úshin, men otynshylarǵa qazirgi zamanǵy kıim kıgizdim: djınsy, fýtbolka, báteńke. Tabıǵat aıasynda olardyń beıneleri turpaıy bolyp shyqty, naǵyz basqynshylardyń beınesindeı», - deıdi Natalıa Protasova.
Spektakl dekorasııalarynyń jobasyn Jandos Omarov jasady: «Spektakl bezendirýiniń basym bóligi jumsaq dekorasııa. Sonyń arqasynda biz qońyr kúzdegi naǵyz torańǵy toǵaıynyń ózin jasap shyqtyq. Jalpy sany otyz myńnan astam árbir japyraqty biz arnaıy matadan jasadyq. Áýeli ony arnaıy toqyma boıaýyna malyp, qaınatyp, sosyn keptirdik. Sodan keıin, árbir qajet zatty qolmen kesip daıyndadyq. Munyń bári dekorasııanyń kólemdi ári shynaıy áser qaldyrýy úshin jasalady».
«Astana Balet» teatryn qurǵan kezde, ujym aldyna qoıylǵan maqsattyń biri – ulttyq horeografııany nasıhattap, tyń ulttyq baletter shyǵarý edi. Bul mindetin teatr sátti atqaryp keledi: onyń repertýarynda úsh ulttyq balet, «Uly Dala murasy» baǵdarlamasy bar. Al, 6 jáne 7 qarashada kórermen nazaryna «Jeltorańǵy týraly ańyz» atty jańa balet usynylady.
Spektaklderdiń bastalýy: 6-qarasha, saǵat 19:30. 7-qarasha, saǵat 18:00.