Búgingi tańda Qordaı aýdanynda turatyn ózge ult ókilderin qazaq tiline úıretý maqsatynda arnaıy oqytý kýrstary jandanýda. Sonymen qatar, jýyrda ǵana aýdannyń Sortóbe aýylynan "Imamdar úıi" ortalyǵy ashylǵan bolatyn. Munda oblys ımamdary bas qosyp, qoǵamdaǵy túrli taqyryptardy talqylaıtyn bolady. Sondaı-aq, atalǵan mekemede ózge ult ókilderine qazaq tilin úıretý dáristeri de uıymdastyrylady, dep habarlaıdy Egemen.kz
Jýyrda boı kótergen "Imamdar úıi" ortalyǵynyń jumysymen tanysý maqsatynda Jambyl oblysynda jumys saparymen júrgen Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly Sortóbe aýylyna arnaıy bardy. Sonymen qatar, atalǵan ortalyq resmı túrde ashylyp, oǵan QMDB tóraǵasymen birge atalǵan basqarmanyń fatýa bóliminiń meńgerýshisi Sansyzbaı Qurbanuly, oblystyq ortalyq "Hıbatýlla Tarazı" meshitiniń bas ımamy Beıbit Myrzageldıev, oblystyq din isteri basqarmasynyń basshysy Jangeldi Omarov jáne ózge de azamattar qatysty.
"Búgingi ashylǵan "Imamdar úıi" dinniń aq jolyn ýaǵyzdaýǵa, jastardy adamgershilik pen ımandylyqqa tárbıeleýge óz úlesin qosatynyna senimdimin. Búginde osyndaı ortalyq ashyp, dinimiz ben dástúrimizdi nasıhattaýymyz – táýelsizdigimiz ben birligimizdiń arqasy", deıdi Qordaı aýdanynyń ákimi Rústem Dáýlet.
Jańa salynǵan "Imamdar úıinde" ońaltý, beıbitshilik pen kelisim bólmeleri jáne ózge ult ókilderine qazaq tilin úıretý synyby, dárishana, kitaphana, medısınalyq pýnkt jáne májilis zaly bar. Budan bólek, ashana, jýyný bólmelerimen qatar keletin meımandarǵa arnalǵan jataqhana da qarastyrylǵan. Sondyqtan da bul tek dinı ortalyq emes, bilim alýǵa, pikir almasýǵa arnalǵan ortalyq bolyp esepteledi. Munda kelip taǵdyr tálkegine túsken jandar da keńes ala alady. Qordaı aýdanynyń bas ımamy Dáýren Quttybaevtyń aıtýynsha, "Imamdar úıi" kópshiliktiń qoldaýymen turǵyzylǵan eken.
Jambyl oblysy