Helsınkı áýejaıyna kelgen jolaýshylar arasynan koronavırýs juqtyrǵandardy qyzmettik ıtterdiń kómegimen anyqtap jatyr. Ázirge synaqqa 16 janýar qatysyp jatyr. Bul týraly Reuters aqparat agenttigi habarlady.
Synaq barysynda jolaýshylar maılyqpen terisin súrtip, mamandarǵa tapsyrady. Al arnaıy ydysqa salynǵan bıomaterıaldy ıtter ıiskep, COVID-19 juqtyrǵandardy anyqtaıdy. Eger oń nátıje kórsetse, úrip mamandarǵa belgi beredi. Osydan soń ıtter nusqaǵan jolaýshylar qosymsha PTR-testileýden ótedi.
Mamandardyń aıtýynsha, koronavırýs juqtyrǵandardy qyzmettik ıttermen tekserý jyldam ári arzanǵa túsedi. Atap aıtsaq, ıisshil janýarlar ınfeksııa juqtyrǵan naýqastardy test nátıjesinen 5 kún buryn anyqtaýǵa kómektesedi eken.
Jalpy, COVID-19 juqtyrǵandardy ıtterdiń kómegimen tekserý áýejaı úshin 300 myń eýroǵa shyǵady. Bul PTR-testileýden edáýir arzan.