Nur-Sultan qalasynyń Tótenshe jaǵdaılar departamenti "Qazgıdromet" RMK málimetinshe, 9-11 qarashada Nur-Sultanda kóktaıǵaq, ońtústik-batystan soǵatyn jeldiń ekpini 15-20 m/s bolady. 9 qarashada kúndiz jel ekpini 23 m/s jetedi, 10-11 qarashada burqasyn kútiledi, dep habarlaıdy Egemen.kz.
"Qala turǵyndary men qonaqtary abaı bolyp, aýa raıynyń ózgerýin baqylap, engizilgen shekteýler týraly aqparatpen tanysýǵa keńes beriledi. Qurylys nysandaryna qolaısyz aýa raıyna baılanysty halyqty jáne aýmaqty qorǵaý boıynsha qosymsha sharalar qabyldaý qajet, múmkindiginshe obektilerdegi qurylys-montajdaý jumystarynyń qyzmetin shekteý kerek", delingen habarlamada.
Sondaı-aq qutqarýshylar tótenshe jaǵdaı kezinde ózin qalaı ustaý kerektigi týraly birqatar usynys aıtty.
"Eger siz qatty jelde qalyp qoısańyz, qorǵan bolatyn ǵımarattarda aıaldaýǵa keńes beremiz. Úılerdiń qabyrǵalaryna jaqyn jerlerde turmańyz, óıtkeni shatyrlardan shıfer men basqa shatyr materıaldary qulaýy múmkin. Eshqandaı jaǵdaıda qoǵamdyq kólik aıaldamalarynyń, bılbordtardyń, aıaqtalmaǵan ǵımarattardyń, aǵashtardyń astyna tyǵylmańyz. Qatty jel kezinde elektr jelileriniń astynda turý jáne úzilgen elektr symdaryna jaqyndaý óte qaýipti", deıdi sarapshylar.
Daýyl kezinde eń aldymen turǵyn úılerdegi elektr jelileri men jabdyqtardyń, jylytý peshteriniń jaǵdaıyn tekserý kerek. Páterde elektr jelisiniń kerneýi joǵarylaǵan kezde barlyq turmystyq elektr qurylǵylaryn dereý óshirý kerek.
Qulap qalmas úshin kóktaıǵaq kezinde kelesi erejelerdi saqtaý qajet:- bıik ókshelerden bas tartyp, tabany taıǵanamaıtyn aıaq kıimdi tańdańyz;- joldaǵy júrginshiler ótetin jerde óte muqııat bolyńyz: asyqpańyz jáne júgirmeńiz;- kólbeý beti bar barlyq jerlerdi aınalyp ótýge tyrysyńyz;- múmkindiginshe qoldaryńyz bos bolýy kerek, aýyr sómkelerdi alyp júrmeýge tyrysyńyz, qolyńyzdy qaltańyzǵa salmańyz, bul qulaý qaýpin týǵyzýy múmkin;- qart adamdarǵa rezeńke ushy bar nemese úshkir ushy bar arnaıy taıaqsha ustaý qajet.
Tótenshe jaǵdaı týyndaǵan jaǵdaıda 112 telefon nómirine qońyraý shalý qajet.