Túrkistan óńirinde elektrondy kommersııa qarqyn aldy. Pandemııa kezinde ásirese mal saýdasynyń onlaın túri damyǵan Túrkistan oblysynda turǵyndar jańa platformany ıgerýde. Atap aıtsaq, Báıdibek aýdanynyń sharýalary úıden shyqpaı-aq, malyn ótkizip, nápaqasyn taýyp otyr. Aýdanǵa jasaǵan jumys sapary barysynda oblys ákimi О́mirzaq Shókeev jas kásipkerlermen kezdesip, ata kásipti násipke aınaldyrǵan azamattardyń batyl bastamalaryn qoldady, dep habarlaıdy Egemen.kz oblys ákiminiń baspasóz qyzmetine silteme jasap.
"Kreatıvti oılap, zaman aǵymyna qaraı batyl qadam basa bilgen óte durys. Kez - kelgen kásiptiń qyr - syryn meńgergen adam qatarynan ozady. Mal sharýashylyǵyn damytyp júrgen ózderińizdeı jastardyń baryn estip, arnaıy keldim. Bilgen kisige mal asyraý ári jumys, ári paıda kózi. Karantın kezinde kásiptiń kózin taýyp, elektrondy kommersııaǵa kóshken betburystaryńyz úlgi bolar is",-dedi О́mirzaq Estaıuly aýyl jastarymen kezdesý barysynda.
Jańa býyn ókilderi Aqbastaý eldi mekenindegi "Ernur korporasııasy" jeke seriktestiginiń keshendi sharýashylyǵynda bas qosty. Olardyń barlyǵy egin jáne mal sharýashylyǵyn myqtap qolǵa alǵan. О́z tehnıkasy men 4 myń ga deıin sharýa qojalyqtaryna ıelik etedi.
Osy sharýamen túbegeıli aınalysatyn aýyl turǵyny Almaz Altaıuly asyl tuqymdy iri mal sanyn arttyrýdy qolǵa alǵan. Karantındi kedergi kórmegen azamat onlaın tapsyrys berý arqyly taýly Altaıdan kalmyqtyń asyl tuqymdy 121 sıyryn satyp alǵan. Áleýmettik jeliniń kómegimen shetelden tórt túlikti tapsyryspen aldyrǵan azamat osylaısha artyq shyǵynnan arylǵanyn aıtady.
Aýdanda tórt túlikti onlaın túrde saýdalaý isi qarqyn alǵan. Koronavırýs indetine baılanysty mal bazalarynyń jabylýy bóget bolmaǵan báıdibektikter el arasynda jıi paıdalanatyn messendjerlerde saýda júretin chattar ashqan. Onlaın bazarda jylqy, sıyr, qoı, eshki jáne úı qusynyń túr-túrin, tipti ekzotıkalyq taýys qusyna (pavlın) deıin satyp alýǵa bolady.
Aýdan jastary tórt túlikti saýdalaýǵa arnalǵan saıt qurastyrýǵa kirispek. Ázirge mal satyp alý-satý úshin 7000-ǵa jýyq turǵyn WhatsApp pen Telegram messendjerleri arqyly "Berekeli Báıdibek" "Báıdibek Mal Bazary" chatyna tirkelip, paıdalaný tıimdiligin túsingen.
"Karantın kezinde aýyldaǵy jas kásipkerler ortaq chat ashyp, saýdany jalǵastyrdyq. О́te yńǵaıly. Ár demalys saıyn halyq malyn jetektep, mal bazaryna aǵylaly. Onda oryn úshin qarjy shyǵyndaıdy. Kúni boıy turyp, maly ótse ótti, ótpese qaıta jetektep úıine qaıtady. Sondyqtan bárine ortaq máseleni osylaı sheshtik. Alda arnaıy saıt ashyp, Báıdibek aýdanynyń mal sharýashylyǵyn ári qaraı damytýdy kózdeımiz", - deıdi sharýa qojalyǵynyń basshysy Abylaı Qaıratuly.
Aýylsharýashylyǵy basqarmasy bergen málimetke súıensek, osy jyldyń 9 aıynda óńirde mal basy shamamen 5-7 al, et óndirý 2,2 paıyzǵa artqan.
Ǵalamtordaǵy saýdasy negizinen maltabu.kz, malsatu kz, malbazar kz, jáne whatsApp, Telegram jelileri arqyly qyzady. Sonymen qatar, mal tuqymyn asyldandyrý úshin shetelden mal ákelý máselesi de toqtamapty. Karantıge qaramaı bıyldyqqa syrttan 3000-ǵa jýyq iri qara satyp alynǵan. Odan bólek túıe sharýashylyǵyn damytý úshin 1305 bas oısyl qara tuqymy alynǵan. Júıeli jumystardyń arqasynda óńirde mal baǵasyn bir qalypty ustap turýǵa múmkindik týǵan.
Nátıjesinde mal baqqan sharýalar da shyǵynǵa batpaı, óńirde tórt túlik óniminiń negizsiz qymbattaýyna jol berilmegen. Qazir óńirde óndirilgen et ónimderi el aýmaǵymen qatar, kórshi О́zbekstan Respýblıkasyna saýdalanýda.