Qorǵanys mınıstrliginde apparattyq keńes ótti. Keńes barysynda jańa oqý jylyna daıyndyq boıynsha nusqaýlar berildi, dep habarlaıdy Egemen.kz.
Qarýly Kúshter túrleriniń bas qolbasshylaryna, óńirlik qolbasshylyqtar áskerleriniń, ásker tekteriniń qolbasshylaryna 25 qarashaǵa deıin oqý jylyna tolyq ázirlikti qamtamasyz etý tapsyryldy. Bul eń aldymen oqý-materıaldyq bazany, oqý-jaýyngerlik tobynyń qarý-jaraǵy men áskerı tehnıkasyn josparlaý jáne daıyndaý máselelerine qatysty.
Sonymen qatar, osy ýaqytqa deıin ótken jyldyń qorytyndylary shyǵarylyp, aldaǵy ýaqytqa mindetter qoıylýy tıis. Aǵymdaǵy jyldyń qarasha aıynda Qorǵanys mınıstrliginiń alqa otyrysyn ótkizý belgilendi. Otyrysta armııanyń tynys–tirshiliginiń negizgi máseleleri, jedel jáne jaýyngerlik daıarlyq, áskerı tártiptiń jaı-kúıi, materıaldyq-tehnıkalyq qamtamasyz etý, sybaılas jemqorlyqqa qarsy zańnamany saqtaý qaralady.
Parlament Májilisi depýtattaryn saılaýǵa daıyndyq qyzmettiń mańyzdy baǵyty bolýǵa tıis. Barlyq uıymdastyrý máselelerin retteıtin jumys toby quryldy. Máselen, barlyq áskerı qyzmetshilerge, onyń ishinde merzimdi qyzmettegi áskerı qyzmetshiler men kýrsanttarǵa, sondaı-aq shet elderdegi kýrsanttarǵa daýys berýge kedergisiz qatysýǵa múmkindik berý bolyp tabylady.
Avtomattandyrylǵan basqarý júıesin qoldaný aıasyn keńeıtý boıynsha tapsyrmalar berildi. Oǵan elektrondy qujat aınalymy da, áskerlerdiń qyzmetine qajetti málimetterdi sandyq esepke alý da kiredi. Áskerı basqarý organdarynda bólimsheler quryldy, al áskerı bólimderde avtomattandyrylǵan basqarý júıesi qyzmetin uıymdastyrýdy qamtıtyn laýazymdar engizildi. Basqarýdyń avtomattandyrylǵan júıesin jetildirý materıaldyq qarajattyń jumsalýyn, adam resýrstaryn paıdalanýdy qysqartýǵa múmkindik beredi, sondaı-aq barlyq deńgeılerde neǵurlym jedel sheshim qabyldaýdy qamtamasyz etedi.
Qorǵanys mınıstri general-leıtenant Nurlan Ermekbaev jaýyngerlik ázirlikti saqtaýdyń mańyzdy faktory bolyp tabylatyn koronavırýstyq ınfeksııanyń taralýynyń aldyn alý jónindegi is-sharalardyń múltiksiz oryndalǵanyn eske saldy. Olarǵa sanıtarlyq sharalar (dezınfeksııalyq óńdeý, medısınalyq baqylaý, ýaqtyly dıagnoz qoıý) jáne uıymdastyrýshylyq (áleýmettik qashyqtyq, qashyqtan jáne onlaın rejıminde jumys isteý, baılanysqa shekteý qoıý) kiredi.
Aǵymdaǵy jyly Nur-Sultan men Almaty qalalarynda bıýdjet qarajatynan emes, jabdyqtalǵan eki PTR-zerthana paıdalanýǵa berildi. Sonymen qatar, jaqyn arada basqa óńirlerdegi áskerı medısınalyq mekemeler júıesinde PTR-zerthanalardy iske qosýdy qamtamasyz etý týraly nusqaýlar berildi.
Qorǵanys vedomstvosynyń basshysy qabyldanyp jatqan sanıtarlyq-epıdemıologııalyq sharalarǵa qaramastan, jedel jáne jaýyngerlik daıarlyqtyń qarqyndylyǵy, áskerlerdiń jaýyngerlik oqý sapasy tómendemeýge tıis ekenin atap ótti. Jeltoqsan merekeleri qarsańynda aldyn alý sharalaryn eskere otyryp, barlyq saltanatty is-sharalardy ótkizý týraly máseleni pysyqtaý tapsyryldy.
Elimizdiń barlyq óńirlerinde jumyldyrý resýrstaryn daıyndaý sapasyn arttyrý boıynsha mindetter qoıyldy. Budan basqa, jas býyndy áskerge shaqyrý jáne qabyldaý barysynda materıaldyq qamtamasyz etý, onyń ishinde zattaı múlikpen qamsyzdandyrý, tamaqtandyrý, merzimdi qyzmettegi áskerı qyzmetshilerdi ornalastyrý úshin kazarmalyq-turǵyn úı qoryn daıyndaý máselelerine erekshe nazar aýdaryldy.