Túrkistan oblysynyń polıseıleri saýda ortalyǵynyń birinen jeti mıllıon teńgeniń altyn buıymdaryn urlaǵan kúdiktini ustady, – dep habarlaıdy Polisia.kz.
Túrkistan QPB kezekshi bóliminiń “102” pýltine saýda ortalyqtarynyń birine belgisiz er adam kirip, qarý-jaraqpen qorqytyp, kúsh qoldanyp altyn buıymdardy urlap, qashyp ketkeni týraly habarlama kelip tústi. Jábirlenýshige keltirilgen shyǵynnyń jalpy kólemi shamamen jeti mıllıon teńgeni qurady. Atalǵan faktini polısııa qyzmetkerleri QR QK-niń 192-baby (Qaraqshylyq) boıynsha SDTBT-ǵa tirkep, kúdikti adamdy izdestirýge kiristi.
Qaraqshylyq shabýyldyń tapa tal túste oblys ortalyǵynyń kóshesinde oryn alǵanyn eskere otyryp, Polısııa departamentinde tájirıbeli qyzmetkerler qatarynan jedel-tergeý toby quryldy. Jedel ýákilder qylmys ornyn muqııat qarap, beınebaqylaý kameralaryn zerttep, yqtımal kýágerlerden jaýap aldy. Polısııa ár aýla men kósheni aralady, qylmyskerdiń urlanǵan zattardy satýy múmkin lombardtar men satyp alýshylardy tekserdi.
Eki kúnnen keıin jedel sharalar barysynda arnaıy qurylǵan izdestirý tobynyń qyzmetkerleri kúdiktiniń izine tústi. Ony Kentaý qalasy kósheleriniń birinen ustady. Kúdikti jumyssyz, Túrkistan qalasynyń turǵyny bolyp shyqty. Ustalǵan azamat polısııa basqarmasyna jetkizilip, ÝUI-ǵa qamaýǵa alyndy.
Tergeý barysynda anyqtalǵandaı, qaraqshylyq shabýyldan keıin kúdikti qalalyq joldar arqyly qashyp ketken. Jigit beınekameralar men izdestirýden qutylý úshin kıimin basqa kıimge aýystyryp alyp, taksıge otyryp Kentaý qalasyna qaraı bet alǵan. Bul qaraqshylyq jasaǵan kúdiktini izdeýge eki kún jumsaǵan jedel ýákilderdiń jumysyn qıyndatty. Belgili bolǵandaı, kórshi qalada kúdikti lombardqa altyn buıymdardyń birin tapsyryp, al aqshasyn óz qajettiligine jumsaǵan. Qazirgi ýaqytta Túrkistan QPB-nyń tergeýshilerimen qaraqshylyq shabýyl deregi boıynsha sotqa deıingi tergeý amaldary júrgizilýde. Urlanǵan altyn buıymdary aıǵaqty zat retinde tárkilenip alynyp, zańdy ıesine qaıtaryldy. Tergeý jalǵasýda.