Jaıaý júrý, jaıaý alys saparlarǵa shyǵý – ári densaýlyqtyń, ári el tanyp, jer tanýdyń kepili. «Er azyǵy men bóri azyǵy – jolda» demekshi, jaıaýlata saparǵa shyqqan jolaýshyny qarsy alyp, qurmet kórsetý – qonaqjaı halqymyzǵa tán qasıet.
Qıyrlarǵa jaıaý jol tarta sapar shegetin dástúrdi jańǵyrtýshy jankeshti jandardyń biri – shapshań júrýden sport sheberi, karateshi, rýhanı izdenýshi aqtóbelik Sársenbaı Sámetuly Erqasymov. Ál-Farabıdiń 1150 jyldyǵy, Pir Beket Atanyń 270 jyldyǵy, Abaı Qunanbaıulynyń 175 jyldyq mereıtoıy qurmetine arnaǵan kezekti «Qasıetti sapar» atty jaıaý ekspedısııasynyń 80%-yn júrip ótken ol Mańǵystaý óńirine taban tiredi. Qazaq jerindegi qasıetti jerlerdi aralap duǵa etý, el men jerdiń amandyǵy men bútindigi, jarqyn bolashaǵy úshin tilek tileý, qazaq halqynyń rýhanı tanymdaryn sanada jańǵyrtý, kıeli oryndar men tarıhı tulǵalardy ulyqtaý, beıitterine zııarat etý jáne jas urpaqqa adam boıyndaǵy jan men tánniń múmkindigin kórsetý, sondaı-aq elimizdegi rýhanı-mádenı týrıstik oryndarǵa serpin berý, nazar aýdartý maqsatyndaǵy «Qasıetti sapar» sharasy Qazaqstan astanasy men tórt oblysy – Nur-Sultan qalasy, Túrkistan, Qyzylorda, Aqtóbe, Mańǵystaý aýmaǵyn qamtıtyn joba.
Ábý Nasyr ál-Farabı týǵan jer – Túrkistan oblysynyń Sháýildir aýdanyna, odan Otyrar aýdanyndaǵy Arystan bab mazaryna zııarat etip, Túrkistan qalasyndaǵy Qoja Ahmet Iаsaýı kesenesi arqyly Qyzylorda oblysy, Qarmaqshy aýdany, Josaly kentindegi Qorqyt Ata keshenine jetip, odan Aqtóbe oblysy, Shalqar aýdanynyń Bozoı kentine, odan Mańǵystaý oblysy, Beıneý aýdany Eski Beıneýdegi Beket Ata meshitine deıin jetetin sapardyń jol uzaqtyǵy shamamen 1 500 shaqyrymdy qamtyp, 1 aı ýaqytqa sozylady dep eseptelgen.
Buǵan deıin Sársenbaı 1999 jyly Pir Beket Atanyń 250 jyldyǵy aıasynda Aqtóbe oblysy, Bekqul Áýlıe – Tama Eset Kókiuly – Dosjan haziret – Kók Etik Áýlıe – Dáýimshar batyr – Asan Qoja – Bazar Qoja – Atyraý oblysy, Beketa Ata Aqmeshiti, Qulsary qalasy – Mańǵystaý oblysy, Eski Beıneýdegi jáne Oǵylandydaǵy Beket Ata meshitteri boıynsha saparlap, 1 440 shaqyrym joldy jaıaý baǵyndyrǵan. Araǵa on jyl salyp, ıaǵnı 2009 jyly ol pir Beket Atanyń 260 jyldyǵyna oraı Mańǵystaý oblysyndaǵy Mańǵystaý aýdany «Adaı Ata – Otpan taý» tarıhı-mádenı kesheni – Qaraqııa aýdany Shopan Ata meshiti – Oǵylandydaǵy Beket Ata meshitine deıin 250 shaqyrymdy júrip ótken bolatyn.
Saǵatyna 7-8 shaqyrym shapshań júrýdi, karate sportynan eń joǵarǵy kórsetkishi – qabyrǵamen júgirýdi meńgergen, rýhanı izdený nátıjesi – adamdy kosmoınfo-energetıkalyq kartasyn jasaý arqyly tazartý joralǵysyn meńgergen ol 1992-2001 jyldary jastardyń dene bitiminiń durys jetilýi men olardy rýhanı damytýdy tutastyrý maqsatynda jasóspirimderdiń «Aqsarbaz» rýhanı klýbyn qurdy.
«Qasıetti sapar» aksııasy dep atalǵan jaıaý ekspedısııasynyń maqsatyn «Jaıaý saparǵa shyǵý – erikkeniń isi emes. Sapar barysynda ejelgi rýhanı Dala sapary qaıta jańǵyrtylyp, eldiń amandyǵy men bútindigi rýhanı qundylyqqa aınalyp, jurt jumylady jáne jergilikti qasıetti mekenderdi ulyqtaý nasıhattalady. Sonymen qatar shapshań jaıaý júrý sportyn nasıhattaý, qazaqstandyq rýhanı týrıstik marshrýttardy ashý maqsat etiledi», dep túsindiretin Sársenbaı Erqasymov Túrkistan, Qyzylorda, Aqtóbe, Mańǵystaý oblystary aýmaǵyn júrip ótip, dúısenbi kúni Beıneý aýdanyna aman-esen jetken bolatyn. Jolaýshyny Mańǵystaý oblystyq máslıhatynyń depýtaty Rabbım Borashov arnaıy izdep baryp, qurdasy Sársenbaı Sámetulymen tanysyp, qoldaý kórsetý úshin Turysh eldi mekeninen bastap, jolda Amanturly batyr eskertkishine zııarat etip, Beıneýge deıin velosıpedpen qatar júrip kelgen. Odan keıingi mańdaı tirer tus – Eski Beıneýdegi Pir Beket Ata meshiti.
El tanyp, jer tanyp, kúzdiń qara sýyǵynda jaıaý saparlap júrgen jolaýshynyń rýhanı izdenisi taǵylymdy, kórgen-bilgeni qyzyqty ekeni anyq.
Mańǵystaý oblysy