Oral qalasynda er adamnan aqsha bopsalady degen kúdikpen 31 jastaǵy áıel ustaldy. Ol jábirlenýshiniń jeke málimetteri men jeke fotosýretterin jarııalaımyn dep qorqytyp, aqsha talap etken, dep habarlaıdy Egemen.kz.
Tergeý málimetinshe, kúdikti er adamnan 500 myń teńge talap etken. Eger aıtqanyn oryndamasa, onyń jeke ómirine qatysty aqparatty taratyp, jeke sýretterin jarııalaıtynyn aıtqan. Alaıda áıel óz josparyn sońyna deıin júzege asyra almaǵan. Oqıǵa týraly polısııaǵa habar túsip, jedel áreket barysynda kúdikti qolǵa túsken.
Batys Qazaqstan oblysy polısııa departamentiniń aǵa ınspektory Alıma Garıfýllınanyń aıtýynsha, jedel-izdestirý sharalary kezinde aqsha qarajaty men zańsyz áreketke dálel bolatyn uıaly telefon tárkilengen.
«Osy derek boıynsha qylmystyq is qozǵalyp, sotqa deıingi tergeý júrgizilip jatyr», dedi ol.
Kúdiktige qatysty tergeý amaldary jalǵasyp jatyr, zań boıynsha 4 jylǵa deıin bas bostandyǵynan aıyrylýy múmkin.
Buǵan deıin Aqtaýda blogerlerdiń jeke ómirine qatysty materıaldardy taratqan kúdikti ustalǵanyn jazǵan edik.