Qazaq ulttyq qyzdar pedagogıkalyq ýnıversıtetiniń Pedagogıka jáne psıhologııa joǵary mektebiniń 5 stýdenti aýyr atletıkadan qyzdar men jastar arasyndaǵy Qazaqstan Respýblıkasynyń jeke komandalyq chempıonatynda júldeli oryndarǵa ıe boldy. Bul týraly oqý ornynyń Baspasóz qyzmeti habarlady.
Atap aıtqanda, 20 jasqa deıingi qyzdar arasyndaǵy jarysta 55 keli salmaq dárejesindegi Iýlııa Potasova birinshi orynǵa, 59 keli salmaq dárejesindegi Arýjan Murat pen 81 keli salmaq dárejesindegi Gúldana Elýbaı ekinshi orynǵa jáne 59 keli salmaq dárejesindegi Alına Kozınes úshinshi orynǵa ıe boldy.
Al 23 jasqa deıingi jastar arasyndaǵy saıysta Iýlııa Potasova birinshi orynǵa, Arýjan Murat ekinshi orynǵa, Alına Kozınes, Gúldana Elýbaı men Angelına Polıanına úshinshi orynǵa qol jetkizip, oqý ornynyń mereıin ústem etti.
Serpe jáne julqa kóterýden qarsylas shaq keltirmegen boıjetkender búginde ýnıversıtette «Dene shynyqtyrý» mamandyǵy boıynsha bilim alýda. Dene shynyqtyrý jáne sport kafedrasynyń aǵa oqytýshysy Sádýaqas Shyńǵysbaevtyń aıtýynsha, qazirgi kúnde qyzdar jýyrda Shymkent qalasynda ótetin álemdik sport dodasyna daıyndyq ústinde.
Aıta keteıik, Qazaqstan Respýblıkasynyń aýyr atletıka federasııasy uıytqy bolǵan jarys onlaın formatta uıymdastyryldy. Oǵan elimizdiń ár aımaǵynan 15 komanda men jalpy sany 569 ziltemirshi qatysyp, baqtary men baptaryn synady.
ALMATY