"Sýarmaly jerlerdi paıdalaný: jaı-kúıi, problemalar jáne olardy sheshý joldary" taqyrybyna arnalǵan dóńgelek ústel ótti. Sharaǵa ortalyq jáne jergilikti memlekettik organdardyń basshylary, sondaı-aq sý máseleleri jónindegi sarapshylar qatysty, dep habarlaıdy Egemen.kz.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń múshesi Dúısenǵazy Mýsın adamzatqa sýdyń qory shekteýli ári el ekonomıkasynyń turaqty damýyn qamtamasyz etetin ózekti faktor ekenin atap ótti.
«Memleket Basshysy Q.Toqaev bıylǵy jylǵy qyrkúıektegi Joldaýynda aýyl sharýashylyǵyn damytpaı, básekege qabiletti ekonomıka qurý múmkin emestigin aıta kelip, bul salada sheshimin tappaı kele jatqan máselelerdiń biri - tehnologııalyq turǵydan eskirgen sýarý júıeleri jáne t.b. sebepterden sýdyń 40 paıyz mólsheri dalaǵa ketip jatatynyna toqtaldy. Onsyz da sý tapshylyǵynyń zardabyn tartyp otyrǵan elimizde buǵan jol berýge bolmaıtynyn, osy salanyń normatıvtik-quqyqtyq turǵydan rettelýin qamtamasyz etý jáne zamanaýı tehnologııalar men ınnovasııany engizý úshin ekonomıkalyq yntalandyrý sharalaryn ázirleý qajet», - dedi Dúısenǵazy Mýsın.
Transshekaralyq sý paıdalaný máseleleriniń mańyzyn eskere otyryp, osy salanyń halyqaralyq-quqyqtyq negizin qalyptastyrý usynylyp otyr. Sondaı-aq sý sharýashylyǵy obektileri men qurylystaryn tolyq kólemde pasporttaýdy júrgizý, olardyń tehnıkalyq jaı-kúıin esepke alý qajettigi atap ótildi.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev aýyl sharýashylyǵynda sýarmaly eginshilikti damytýdyń ekonomıkalyq, áleýmettik jáne ekologııalyq mańyzyn eskere otyryp, aýyl sharýashylyǵy jerlerin sýarý kezinde sý ysyrabyn azaıtý, sondaı-aq sýarmaly eginshilikke qazirgi zamanǵy tehnologııalar men ınnovasııalardy engizý úshin ekonomıkalyq yntalandyrý jónindegi keshendi sharalar ázirleý qajettigin atap ótti.
Shara barysynda sondaı-aq aýyl sharýashylyǵy birinshi vıse-mınıstri Aıdarbek Saparov, ekologııa, geologııa jáne tabıǵı resýrstar vıse-mınıstri Sergeı Gromov, Qazaq sý sharýashylyǵy ǵylymı-zertteý ınstıtýtynyń bas dırektory Nurlan Balǵabaev, "Qazaqstan Respýblıkasy Aýyl sharýashylyǵy mınıstrliginiń agrohımııalyq qyzmeti respýblıkalyq ǵylymı-ádistemelik ortalyǵy" RMM dırektory Nurlan Sádibekov, "О́.O.Ospanov atyndaǵy Qazaq topyraqtaný jáne agrohımııa ǵylymı-zertteý ınstıtýty" JShS basqarma tóraǵasynyń m. a. Beıbit Súleımenov, "Qazsýshar" RMK bas dırektory Arman Qasenov, sondaı-aq Túrkistan, Almaty, Jambyl jáne Qyzylorda oblystary ákimderiniń orynbasarlary qatysty.
Dóńgelek ústel qorytyndysy boıynsha Úkimetke jiberiletin usynymdar ázirlendi.