Shymkentte avarııalyq-qutqarý jáne kommýnaldyq-tehnıkalyq qamtamasyz etý qyzmetteriniń qys mezgiline daıyndyǵyn pysyqtaý is-sharasy ótti, dep habarlaıdy Egemen.kz
Qala ákimi M.Áıtenov, tótenshe jaǵdaılar departamenti bastyǵynyń orynbasarlary, azamattyq qorǵaý polkovnıgi M.Jaqsybaev, polkovnık J.Kárimbaev arnaıy tehnıkanyń daıyndyǵyn tekserdi. Sondaı-aq, is-sharaǵa jol-patrýldik polısııasynyń qyzmetkerleri de qatysty.
Is-sharanyń maqsaty – qys mezgiline ınertti materıaldar qorymen qamtamasyz etý jáne tótenshe jaǵdaılarda avarııalyq-qutqarý jumystaryna jol-paıdalaný tehnıkanyń daıyndyǵyn tekserý, arnaıy tehnıkanyń jumysqa jaramdylyǵyn jáne tehnıkalyq jaǵdaıyn anyqtaý.
Kommýnaldyq-tehnıkalyq qamtamasyz etý qyzmetiniń quramyndaǵy 5 uıym – "LTD Turmys"," "Iýgdorservıs", "Báıterek LB", "Nurtas servıs" jáne "Jasyl jer" mekemeleri qajetti tehnıkalarmen jabdyqtaldy. Atalǵan bes mekeme qalada uzyndyǵy 1012,16 shaqyrym 299 kóshede qyzmet kórsetedi.
Qysqy maýsymǵa ınertti materıaldardan, 5000 tonna tuz, 17217 m3 qum daıyndalǵan. Jeke quramynda 670 adam jáne 182 tehnıka daıyndaldy. Sondaı-aq, Shymkent qalasy tótenshe jaǵdaılar departamentinen 28 tehnıka qajetti quraldarmen jabdyqtaldy. Qysqy maýsymǵa daıyndalǵan tehnıkanyń jalpy sany – 210 birlik (joǵary ótimdi tehnıka, shnekorotor, avtosamosval, avtogreıder, býldozer, pogrýzchık t.b.).
Tehnıkalardyń qysqy maýsymǵa daıyndyǵyn tekserý barysynda qys mezgilinde qaýipti meteorologııalyq qubylystardyń paıda bolýyna baılanysty tótenshe jaǵdaılardyń aldyn alý jáne joıý máseleleri pysyqtaldy.
Qysqa daıyndyq barysynda anyqtalǵan barlyq kemshilikter qalalyq tótenshe jaǵdaılar komıssııasynyń otyrysynda qaralady.