Jańa marketıngtik jyldyń 4 aıynda Qazaqstan 2 mln 734 myń tonna astyq pen astyq ekvıvalentindegi un eksporttady. Onyń 1 mln 934 myń tonnasy bıdaı, 701 myń tonnasy un.
Aýyl sharýashylyǵy mınıstrliginiń habarlaýynsha, ótken marketıngtik jyldyń alǵashqy 4 aıynda elimiz shet memleketterge 1 mln 624 myń tonna bıdaı men 628 myń tonna astyq ekvıvalentindegi un eksporttaǵan. Basqa arpa, suly, júgeri, kúrish, qaraqumyq, tary syndy dándi daqyldar eksporty 2020-2021 marketıngtik jyldyń 4 aıynda 98 myń tonnany qurady, onyń ishinde 76 myń tonna arpa Iran eline jóneltildi.
– Bıdaı men bıdaı unynyń basym bóligi bıyl Ortalyq Azııa elderine satyldy. 1 mln 293 myń tonna – О́zbekstanǵa, 406 myń tonna – Tájikstanǵa jóneltildi. Qyrǵyzstan men Túrikmenstanǵa satý kólemi – 38 jáne 11 myń tonnany quraıdy. Bıylǵy 1 shildeden bastap Aýǵanstanǵa 593 myń tonnaǵa jýyq, Qytaıǵa 194 myń tonna eksporttaldy, – dep habarlady vedomstvonyń baspasóz qyzmeti.
Sońǵy jyldary Grýzııaǵa astyq pen un satý tómendegen. Bul el 2014 jylǵa deıin basym naryqtar qataryna kirgen bolatyn. О́tken marketıngtik jyly Qazaqstan Grýzııaǵa bar bolǵany 2,6 myń tonna astyq pen un satsa, bıyl otandyq ónim múlde jóneltilmedi.
Birqatar elderdiń qazaqstandyq unǵa degen qyzyǵýshylyǵynyń tómendegenin de aıtpaı kete almaımyz. Aıtalyq, qazaqstandyq ónimniń iri ımporttaýshysy bolyp tabylatyn О́zbekstanǵa 2011-2012 marketıngtik jyly – 1,3 mln tonna un, 2015-2016 jyldary – 843 myń tonna, 2019-2020 jyldary – 345 myń tonna jiberilse, 2020-2021 marketıngtik jyldyń 4 aıynda kórshi el bar bolǵany 103 myń tonna un satyp aldy.
Sońǵy jyldary qazaqstandyq un eksporty Aýǵanstan men Qytaı naryǵyna kóptep jiberilip jatqanyn atap ótken jón. Naryq qatysýshylary úshin Qazaqstan arqyly ótetin astyq pen un tranzıtiniń kólemi týraly aqparat mańyzdy bolyp tabylady.
2020 jylǵy shildede respýblıka aýmaǵy arqyly basqa elderge 17,4 myń tonna, tamyzda – 32,8 myń tonna, qyrkúıekte – 25,5 myń tonna, qazanda – shamamen 25 myń tonna astyq jetkizildi. Eń kóp júk kólemin – shamamen 42 myń tonnany Qyrǵyzstan aldy.
Aýyl sharýashylyǵy mınıstrligi habarlaǵandaı, shildede – 9,6 myń tonna, tamyzda – 11 myń tonna, qyrkúıekte – 8 myń, qazanda 12 myń tonna bıdaı uny tranzıtteldi. Júkterdiń kóp bóligi, ıaǵnı 48 myń tonnasy Aýǵanstanǵa baǵyt alǵan. Astyq ekvıvalentindegi astyq pen unnyń jalpy tranzıti 160 myń tonnaǵa teń.
Bıyl 3 qarashada BUU-nyń Eýropaǵa arnalǵan Azyq-túlik jáne aýyl sharýashylyǵy uıymynyń 32-sessııasynda Aýyl sharýashylyǵy mınıstri Saparhan Omarov: «Koronavırýs pandemııasyna, lokdaýnǵa jáne osyǵan baılanysty shekteýlerge qaramastan, Qazaqstan kórshi elderge azyq-túlik jetkizýdi jalǵastyrdy. Bıylǵy 8 aıda ShYU elderine 1,3 mlrd dollardyń azyq-túligi jóneltildi, al ótken jyly bıdaı men un eksporty esebinen Qazaqstan ǵalamshardyń 45 mıllıonnan asa halqyn tamaqtandyrdy» degen bolatyn. Sondaı-aq mınıstr kórshi elderdegi suranystyń ósýin eskere otyryp, Qazaqstan aýyl sharýashylyǵy ónimderi men azyq-túlik ónimderin óndirýdi ulǵaıtýdy jalǵastyratynyn málimdedi. Sandyq kórsetkishter ǵana emes, ónim sapasy da mańyzdy bolmaq. Atap aıtqanda, elimizdiń organıkalyq aýyl sharýashylyǵyn damytýǵa úlken múmkindikteri bar.
Eýropalyq komıssııanyń resmı derekterinde eksport kólemi boıynsha Qazaqstan Eýropalyq Odaq elderine organıkalyq azyq-túlik ónimderin jetkizetin 123 eldiń ishinde 9-shy orynda tur. Al organıkalyq bıdaı men maıly zyǵyr tuqymdaryn satý boıynsha elimiz kóshbasshylar qataryna kiredi.