Munaıly qaladaǵy ónerpaz ájeler qala mádenıetiniń damýyna óz úlesterin qosýmen qatar, jas urpaqqa ulttyq ónerdi nasıhattap ta keledi. 2007 jyly qurylǵan «Altyn darııa» halyqtyq ájeler ansambli turaqty túrde úlgili jumys jasap, 2017 jyly «Halyqtyq ansambl» ataǵyna ıe boldy.
Ánshi ájelerdiń el mádenıetin damytýdaǵy eńbegi elenip, jýyrda ansambl respýblıkalyq «Ardagerler uıymy» qoǵamdyq birlestiginiń Ortalyq keńesi tarapynan ardagerler ujymy jumysyna sińirgen eńbegi men elimizdiń mádenı damýyna belsendi qatysqany úshin alǵys hatpen marapattaldy.
– «Munaıshy» óner ordasy ónerpazdarynyń jetistikterimen joǵary beleske qol jetkizip keledi. Turǵyndar yqylasyna bólengen, ulttyq ónerdiń nasıhattaýshysy ári janashyry «Altyn darııa» halyqtyq ujymynyń respýblıkalyq «Ardagerler uıymynyń» alǵys hatymen marapattalýy zor jańalyq boldy. Analardyń eńbekteri eldik dárejede elenip, halqymyzdyń alǵysyn alyp otyr, – deıdi Jańaózen qalalyq mədenıet jəne tilderdi damytý bóliminiń basshysy Ulbazar Orynbaeva.
Jańaózen qalasynyń mádenıeti – tamyry tereńdep, japyraǵy jaıqalǵan sala. Munaıly qaladaǵy óner oshaqtary bıik belesterdi baǵyndyryp júr. Qazirgi ýaqytta «Munaıshy» mádenıet úıinde 26 ujym, 11 halyqtyq ujym jáne 36 úıirme turaqty túrde jumys atqarady. «Asyl darııa» ájeler ansambli – solardyń biri.
– Alǵash mádenıet salasyna qadam basyp óner ortasyna túskennen bastap túrli talanttardyń bar ekendigin kórdim. Kez kelgen óner ıesi úshin halyqtyń ystyq yqylasynan artyq marapat joq. Halqymyzdyń dástúrli án-kúı óneriniń dáriptelýi úshin bul ansambldiń mańyzy zor. Osy ujymda júrip, ólkemizdiń kez kelgen aýqymdy mádenı is-sharalarynda óner kórsetip júrgenime rızamyn. Áriptesterimniń ortasynda shynaıy óner ıesine degen qurmetti ıelenip, elimniń súıispenshiligine bólený – úlken baqyt, – dedi ujym jetekshisi Mahbýza Shomanova.
Shyǵarmashylyqtyń shamshyraǵyn jarqyratyp, sol arqyly dástúr sabaqtastyǵyn jalǵaýdy maqsat etken ájeler qandaı qurmetke de laıyq.
Mańǵystaý oblysy