Elimizdegi joǵary oqý oryndarynyń stýdentteri qoǵamdyq isterdi asa belsendilikpen atqaratyny belgili. Qaıyrymdy joba, sporttyq jarys, mádenı is-shara bolsyn jas órender árdaıym alǵy shepten tabylady. Bul ásirese bilim ordalary kóp iri qalalarda kóbirek baıqalady.
Elimizdiń bas qalasynda sabaqtan tys ýaqytynda qoǵamdyq sharalardan qalmaıtyn belsendi jastar kóp. Nur-Sultanda volonterliktiń ózimen turaqty aınalysatyn 1000-nan astam stýdent bar. Jaqynda olar Halyqaralyq yntymaqtastyq kúnin atap ótti.
«Statıstıkaǵa sáıkes, Nur-Sultanda 14 pen 35 jas aralyǵyndaǵy 250 000-ǵa jýyq adam turady. Onyń ishinde 1000-nan astam stýdent volonterlikpen turaqty túrde aınalysady. Jastar odan ózge sharalarǵa da belsendi túrde qatysady. Bul oqý prosesimen qatar, olardyń kásibı nemese jeke tulǵa retinde jetilýine kóp kómektesedi», dedi «Astana jastary» resýrstyq ortalyǵynyń uıymdastyrý bóliminiń basshysy Araılym Saparáli.
Elordada joǵary oqý oryndarynda Jastar isi jónindegi 16 komıtet jáne kolledjderde 35 Jastar keńesi jumys isteıdi. Olar bilim berý mekemeleri qabyrǵasynda stýdentterdiń bos ýaqytyn uıymdastyryp, paıdaly ispen aınalysýyn qadaǵalaıdy. Mysaly, «Turan-Astana» ýnıversıtetiniń «Volonterler klýby» jáne ITU janyndaǵy Phoenix sııaqty qozǵalystar ıgi isterimen qatarlastaryna úlgi. Olardyń qyzmeti negizinen muqtaj jandarǵa kómektesýden turady. «QazMed jastary» quramynda erikti túrde medısınalyq kómek kórsetetin stýdentter bar.
Stýdentter mádenı ómirge de belsendi qatysady. «Astana jastary» jastar resýrstyq ortalyǵy jyl saıyn birinshi kýrs stýdentteriniń resmı saltanatty jıyny men «Jana Beles» shyǵarmashylyq festıvalin uıymdastyrady. Sonymen qatar «Jastar Jalyny Camp» stýdentter lageri bar. «Astana City Quest» oıyny mektep oqýshylary men stýdentterine elordanyń kórikti jerlerin kórsetip, qalanyń tarıhy men búgingi kúninen syr shertýdi kózdeıdi. Odan bólek stýdentter óz ıdeıalaryn «Astana Ideas» startap baıqaýynda usyna alady. Osylaısha ınnovasııalyq jobalaryn júzege asyryp, jas ónertapqysh atanýǵa múmkindik alady. Elimizdiń bas shaharynda stýdentterge arnalǵan ózge de sharalar qatary kóp. Máselen, kolledj stýdentteri «Jas Sarbaz» áskerı-patrıottyq qozǵalysyna qatysyp, jan-jaqty damýyna múmkindik alady. Al volonter bolyp, qaıyrymdy ispen aınalysam degen jastar volonterler mektebinde oqıdy. Bul arqyly tájirıbesi az stýdentter mundaı jaýapty qyzmetke tolyq daıyn bolady. Sebebi syrttan ońaı bolyp kóringen volonterlik qyzmettiń qyzyǵymen qatar qıyndyǵy da bar. Sondaı-aq bıyl JOO men kolledj stýdentteri arasynda onlaın-pikirsaıys týrnıri ótti.
Atalǵan sharalar stýdentterdiń bos ýaqytyn tıimdi ótkizýge yqpal etip qana qoımaı, olardyń qoǵamda óz ornyn taýyp, ózderi sekildi bilimge qushtar, tájirıbe jınaýǵa nıetti, belsendi jastardyń orta qalyptastyrýyna múmkindik beredi.