Turǵyndardyń quqyǵy taptalmasyn dep...

Biz tynyshtyqty qalaımyz. Kóshege shyq­saq ta, baqtarǵa barsaq ta, basqa da qoǵamdyq oryn­darda júrsek te, úıimizde otyrsaq ta alańsyz ekenimiz ras. О́ıtkeni, polısııaǵa senemiz. Kórshiń uıqy bermeı qatty mýzyka qossa, dereý polısııaǵa habarlasasyń. Turǵyn úıdiń kireberisine kóligin tirep qoıa­tyndar bolsa, taǵy da quqyq qorǵaý organ­daryna júginesiń. Osyndaı oqıǵalardy ha­barlasań «qoǵamdaǵy kishigirim quqyq buzý­shylyqtarǵa beıjaı qaramaı, ony toqtatýǵa úles qosqanyńyz úshin rahmet» dep tártip saqshylary da alǵysyn aıtyp jatady.

Departamenttiń baspasóz qyzmetiniń má­li­­metinshe, bıyl oblystaǵy polısııa qyzmet­kerleri 124 myńǵa jýyq ártúrli ákimshilik quqyq buzý­shylyqty anyqtap otyr. Qoǵamdyq oryn­darda mas kúıinde júrgen 7 myńnan astam adam Qylmystyq kodekstiń 440-baby­na sáı­kes qylmystyq jaýapkershilikke, tynysh­tyq­ty buzǵany úshin 2 640-tan astam azamat ákim­shilik jaýapkershilikke tartylypty. Son­da da bolsyn aınala tynyshtalar emes. Ara­myzda qoǵam tynyshtyǵyn buzatyndar kóp.

Máselen, oblys ortalyǵynda «jarylǵysh zat qoıylǵan» ǵımarattan 7 adam evakýa­sııalandy. Oqıǵa ornyna jedel tergeý toby shyǵyp, ǵımarat aýmaǵyn qorshaıdy. «Bıyl 16 qarashada saǵat 10.10-da qalalyq polısııa bólimine Q.Sátbaev kóshesi, 25/1 meken­jaıy boıynsha ornalasqan ǵımarattyń kez kelgen mınýtta jarylýy múmkin eke­ni týraly habarlama tústi. Aýmaq pen ǵıma­rat­ty teksergennen keıin kúdikti nemese ja­rylǵysh zattar tabylǵan joq. Qońyraý jal­ǵan bolyp shyqty», dep habarlaıdy Polı­sııa departamentiniń baspasóz qyzmeti. Izin­she, polısııa qyzmetkerleri kúdiktiniń kim ekenin anyqtaıdy. Ol oblystyq psıhonev­rologııalyq dıspanserde esepte turǵan 41 jastaǵy jergilikti turǵyn bolyp shyqty.

Al oblys ortalyǵyna qarasty Pavlodar aýy­lynda tank snarıadtary tabylypty! Osy jyly 11 qarashada saǵat kúndizgi 11-ler sha­masynda aýylǵa shaqyrtý boıynsha shu­ǵyl qyzmetter: polısııa, jedel járdem, órt són­dirýshiler, jarý tehnıkalary jetti. Sna­rıadtar jeke úıdiń aýlasynda ekeni anyq­taldy. Úı ıesi metall synyqtaryn qabyld­aýmen aınalysady eken. Úı polısııa kúshimen qorshalyp, 10 adam basqa jerge kóshirildi. Saperler tanktiń eki snarıadyn jáne mınomet mınasyn taýyp aldy. Keıin oq-dáriler tárkilenip, baspasóz qyzmeti habarlaǵandaı Qylmystyq kodekstiń 287-baby boıynsha sotqa deıingi tergeý bastaldy.

Pavlodar oblysynyń ekologııasy, qorsha­ǵan ortasy tolyq tazara qoımaǵan óńirlerdiń biri ekeni bárimizge belgili. Zaýyttar, kásip­oryndar kóp shoǵyrlanǵan, súzgiler áli tolyq ornatylmaǵan, aýaǵa ys, kúl taraýda dep da­byl qaǵamyz. Jalǵyz kásiporyndar emes, óńi­ri­mizdiń, qalamyzdyń qorshaǵan ortasyn las­taıtyn kólik júrgizýshiler qatary da az emes eken. Oblystyq Polısııa departamenti bas­tyǵynyń birinshi orynbasary Jasqaırat Qaıyrovtyń málimdeýinshe, jergilikti polısııa qyzmetkerleri basqa da múddeli organdarmen birlesip, atmosferaǵa zııandy zattar shyǵarýdyń ruqsat etilgen normasynan asatyn avtokólik quraldaryn anyqtaý boıynsha aldyn alý is-sharalaryn turaqty túrde júrgizip keledi.

«Osy jyldyń 10 aıynda oblystyń 440-qa jýyq júrgizýshisi elimizdiń zań talaptaryna saı «Lastaýshy zattardyń bolýy normatıvten asyp ketetin avtomotokólikterdi jáne basqa da jyljymaly quraldardy paıdalaný» boıynsha ákimshilik jaýapkershilikke tartyldy. Tártip buzýshyǵa eskertý jasalady nemese 2-den 5 AEK-ke deıingi mólsherde aıyppul salynady», dedi osy taqyrypqa saı ótken brıfıng barysynda J.Qaıyrov. Qorshaǵan ortaǵa jáne halyqtyń densaýlyǵyna keri áser etý dárejesi boıynsha birinshi orynda avtokólikter paıdalanatyn quramynda qaýipti hımııalyq qosylystary bar gazdar tur. Sondyqtan, polısııa qyzmetkerleri ótki­zetin bul arnaıy sharalar – kólikterdiń qorshaǵan orta ekologııasyna zııandy áserin barynsha azaıtý.

Qaladaǵy turǵyn úılerdiń aýlasy qap­taǵan kólik. Sanaly túrde kóligin avtoturaq­qa aparatyn meniń kórshim Hamıt aǵa sııaqty kólik ıeleri óte az. Kólikterin turǵyn úı­diń kireberisinen 5-6 qadam qashyqtyqta qoımaı­tyn da kólik ıeleri bar. Turǵyndardyń úıden kirip-shyǵatyn jolyn jaýyp tastaıdy. Son­daǵy syltaýlary – zamanaýı jerasty avto­turaqtarynyń joqtyǵy.

Kólik demekshi, bıyl 31 qazanda oblys orta­lyǵyndaǵy Mır kóshesi, 36/1 mekenja­ıynda ornalasqan «Diamond» kólik jýý ornynda oqys oqıǵa boldy. Buryn júrgizýshi kýá­liginen aıyrylǵan jáne alkogoldik ma­sań kúıde bolǵan er adam kólik jýýshy V.Naı­dınany qaǵyp ketti. Jedel járdem brı­gadasy 31 jastaǵy áıeldi oblystyq aýrýha­naǵa jetkizdi. Aýrýhanada áıeldiń aıaǵy ampýtasııalandy. Atalǵan fakti boıyn­sha er adam ýaqytsha ustaý ızolıatoryna qama­lyp, Qylmystyq kodekstiń 346-babyna sáı­kes, sotqa deıingi tergeý amaldary júr­gizilýde. Sondaı-aq kólik jýý ornynyń Eńbek qaýipsizdigi erejelerin buzý faktisi bo­ıyn­sha Qylmystyq kodekstiń 156-babyna sáı­kes sotqa deıingi tergeý bastaldy. Endi jumy­synan da, aıaǵynan da aıyrylǵan áıelge kólik jýý orny protez ben dári-dármek shyǵynyn tóleıtin bolady.

Elimizde indet taralmaýy úshin birqatar shekteýler qoıylǵany belgili. Biraq, ol talap­tarǵa baǵynbaı, polısııany syrtta 5 saǵat kúttirip qoıatyn da karaoke, kafe ıeleri bar eken. «Bıyl 15 qarashada saǵat 22.30-da polısııaǵa Astana kóshesi, 16/2 mekenjaıy boıynsha karaoke-bardyń jumys istep turǵany týraly aqparat kelip tústi. Bardyń janynda polıseıler 5 saǵat kútýge májbúr boldy. Al ákimshilik tańǵy 3.30-da ǵana bardyń esigin ashty», dep habarlaıdy polısııa departamentiniń baspasóz qyzmeti. Atalǵan fakti boıynsha tekserý jáne anyqtaý jumystary úshin polısııa bólimine 28 kelýshi men 7 bar qyzmetkeri jetkiziledi. «Bul kúni 8 fakt anyqtaldy. Saǵat 21.40-ta Malaısary batyr kóshesindegi qalanyń laýndj-barlarynyń biri jumys istegen. Kelýshiler kalıan shegip, bı keshin ótkizgen. Kalıan shekken klıentterge qa­tys­ty ákimshilik is qozǵaldy. Mekeme ákim­shisi kalıan tutynýǵa jol bergeni úshin Qyl­mystyq kodekstiń 441-baby boıynsha jaýap­kershilikke tartyldy. Sondaı-aq mate­rıaldar jınaqtalyp, Taýarlar men qyz­metterdiń sapasy men qaýipsizdigin baqylaý basqarmasyna joldandy», deıdi departament qyzmetkerleri.

 Qazir karantındik shekteýler kezinde adamdar úıde bolǵandyqtan, keıbir otba­sylar tapsyryspen onlaın qyzmet jet­kizilimin paıdalanýda. Osyǵan baılanys­ty alaıaqtyqtyń da túri kóbeıgen. Departamenttiń málimetinshe, onlaın qyzmetpen tamaqtyń túr-túrin «jet­kizbekshi» bolǵan 17 top ustalǵan. Qazirgi tań­da alaıaqtyq boıynsha 150-den astam is ter­gelýde.

Al endi, Túrkistan oblysy, Saryaǵash aýdany, Qaplanbek aýylynyń turǵyny Amangeldi Halchabekov Pavlodar oblysynda bolǵan oqys oqıǵany eshqashan umytpaıtyn shyǵar. Bizdiń óńirmen ótetin «Omby – Maı­qapshaǵaı» baǵytyndaǵy halyqaralyq avto­jolǵa asfalt-beton tóselgeni jergilikti júr­gizýshilerge belgili. Osy jolmen 12 qara­sha kúni Amangeldiniń de «DAF» markaly 16 tonnalyq júk kóligi kele jatty. Bul kúni qar qalyń jaýdy. Joldyń asfalt-beton jabyny alǵashqy jaýǵan qalyń qardan kórinbeıdi. Osylaısha, aýyr kólik syrǵanap baryp Ertis ózeni jaǵalaýynyń janyndaǵy jyraǵa aýdarylady. «Men kabınadan qalaı shyqqanymdy ózim de túsinbedim. Birden «102»-ge qońyraý shaldym. Patrýldik polısııa ekıpajy tez kelip jetti. Tereńkól aýdandyq polısııa bó­limi bastyǵynyń birinshi orynbasary Serik Asylbekov te keldi. Apat bolǵan jerge eki K-700 traktory men avtokran kelip, olar­dyń kómegimen kóligim shyǵaryldy», deıdi A.Halchabekov.

«Al kólikti tómennen joǵaryǵa shyǵarý ba­rysy 8 saǵatqa sozyldy. О́te muqııat áre­ket etpesek, aýyr júk kóligi sýǵa túsip ketýi múm­kin edi. Biraq qıyn jáne úılesimdi ju­mys nátıjesinde kólikti shyǵaryp aldyq. Amangeldiniń óz úıine aman-esen jetýin bárimiz tiledik», deıdi kómek kórsetken Serik Asylbekov. A.Halchabekov alystaǵy aýylyna aman-esen jetken soń, S.Asylbekovke, aýdandyq polısııa qyzmetkerlerine qıyn sátte kómekteskenderi, jedel jumys istegenderi úshin rızashylyǵyn bildirip, alǵys hat joldapty.

Iá, kúndelikti ómirde polısııa jaıly anyq-qanyǵyna jetpeı aıtylatyn nebir jónsiz sózderdi estip júrmiz. Soǵan jaýap retinde tártip saqshylarynyń kún demeı, tún demeı atqaryp kele jatqan tynymsyz qyzmetin esh qospasyz, shynaıy mysaldarmen jazyp otyrmyz. Oıly oqyrman ózi oı túıedi dep senemiz.

Pavlodar oblysy