Qaýipsizdik Keńesiniń Tóraǵasy Nursultan Nazarbaev Prezıdenttiń kómekshisi – Qaýipsizdik Keńesiniń hatshysy Áset Isekeshevti qabyldady, dep habarlady Tuńǵysh Prezıdenttiń baspasóz qyzmeti.
Kezdesýde Nursultan Nazarbaev kúrdeli epıdemııalyq ahýal, álemdik ekonomıkalyq daǵdarys pen aımaqtyq syn-qaterler jaǵdaıynda ulttyq qaýipsizdik júıesiniń qyzmetin úılestirýdi kúsheıtý qajettigin atap ótti.
Á.Isekeshev Elbasyna Qaýipsizdik Keńesi apparatynyń ulttyq qaýipsizdiktiń, onyń ishinde ekonomıkalyq, aqparattyq jáne áskerı qaýipsizdiktiń negizgi baǵyttary boıynsha júrgizip jatqan jumystary týraly aqparat berdi.
Sondaı-aq Qaýipsizdik Keńesiniń hatshysy quqyq qorǵaý júıesin odan ári damytý jáne eldegi qylmys deńgeıin tómendetý baǵytynda qabyldanyp jatqan sharalar týraly baıandady.
Sonymen birge Á.Isekeshev Shanhaı yntymaqtastyq uıymy, Ujymdyq qaýipsizdik shart uıymy jáne Táýelsiz memleketter dostastyǵyna múshe elderdiń Qaýipsizdik Keńesteri hatshylarynyń kezdesýleriniń nátıjeleri týraly aıtyp berdi. Atalǵan is-sharalar aıasynda óńirlik qaýipsizdiktiń ózekti máseleleri, terrorızmge, esirtkiniń zańsyz aınalymyna, kıberqaýipsizdik salasyndaǵy qaterlerge qarsy kúresti kúsheıtý sharalary talqylandy.
Kezdesý qorytyndysy boıynsha Qaýipsizdik Keńesiniń Tóraǵasy ulttyq qaýipsizdikti qamtamasyz etýdiń negizgi máseleleri boıynsha birqatar tapsyrma berdi.