Prezıdent Qasym-Jomart Toqaevtyń kelesi aıaldaǵan nysany «Saryarqa» arnaıy ekonomıkalyq aımaǵy boldy. Bul jerde oblys ákimi Jeńis Qasymbek arnaıy ekonomıkalyq aımaqtaǵy ınvestısııalyq jobalardyń júzege asyrylý barysy, turaqty jumys oryndaryn ashý, jeke jáne sheteldik ınvestısııalardy tartý, sondaı-aq, Qazaqstan men Germanııanyń birlesken kásipornynyń jumysy týraly baıandap berdi.
Sonymen birge Memleket basshysyna tehnıkalyq gaz óndirýmen aınalysatyn «LındeGaz Qazaqstan» JShS-niń, kún elektrostansııasy baǵytynda qyzmet etetin «QazSolar-50» JShS-niń, jylý ótkizbeıtin qubyrlar óndiretin «Izoplıýs» JShS-niń jáne sharly krandar shyǵaratyn «Bıomer Armatýra» JShS-niń jetekshileri óz zaýyttarynyń jumysy jáne ónim óndirý kólemin ulǵaıtý jónindegi josparlary jaıynda aqparat berdi. Budan bólek búkil álemde qalyptasqan ekonomıkalyq ahýaldy eskere otyryp, pandemııa kezindegi jumys jaǵdaıy, bıznestiń áleýmettik jaýapkershiligi men qaıyrymdylyq isteri týraly egjeı-tegjeıli baıandaldy.
Qasym-Jomart Toqaev «Qazsolar-50» kompanııasynyń ókilimen áńgime barysynda jańartylatyn energııa kózderine qatysty jobalardy júzege asyrýdyń mańyzdylyǵyna nazar aýdardy.
– Balama elektr energııasy baǵytyn qoldaımyn. Joldaýda birtindep kómirtek paıdalanýdy azaıtý saıasatyn júrgizý kerek ekenin aıttym. Bul baǵyttyń bolashaǵy zor. Búkil álem atalǵan baǵytta damyp jatyr. Men Germanııaǵa barǵanymda osy taqyrypta nemis kompanııalarynyń jetekshilerimen sóılestim. Jalpy olarmen yntymaqtastyqqa nazar aýdarý kerek dep sanaımyn. Kún elektr energııasy bolashaqta birqatar problemany sheshe alatyn qýatty kózge aınalady. Ol sonysymen tartymdy, – dedi Prezıdent.
Sodan keıin Prezıdent kanadalyq zamanaýı tehnologııa boıynsha jylyna latýnnan jasalǵan 30 mıllıon buıym shyǵaratyn «Steel Manufacturing» JShS-niń óndiris aýmaǵyn aralap kórdi.