Soltústik Qazaqstanda jumysyn ashyq júrgizetin, BAQ-qa aqparattardy kóp beretin Polısııa departamenti ǵana. Bir kezde jumystaryn qupııalandyryp, eshqandaı derek bermeıtin vedomstvonyń bul isine rıza bolasyń.
Mine, búgin de olar Instagram jáne Facebook áleýmettik jelileri arqyly onlaın-brıfıng berip, bir aptada 221 qylmystyń tirkelgenin jarııa etti jáne suraqtarǵa jaýap berdi. Jedel-qyzmettik áreketter boıynsha baıandaǵan Departament shtabynyń bastyǵy, polkovnık Sáýle Amantaeva tirkelgen 221 qylmystyń 92 paıyzy ashylǵanyn málimdedi. Tirkelgen qylmystardyń arasyndaǵy rezonans týdyrǵany – Jambyl aýdanyndaǵy kisi óltirý oqıǵasy boldy.
Osy aýdannyń Baıan aýylynda turatyn aǵaıyndy eki jigittiń úlkeni araq ishkennen keıin bolǵan janjaldyń barysynda 27 jastaǵy inisine pyshaq salǵan. Alǵan jaradan inisi sol jerde jan bergen. Qazir ústinen is qozǵalǵan qylmysker arnaıy oqshaýlaǵyshta otyr.
Sonymen qatar ótken aptada oblysta 7 jol-kólik oqıǵasy bolyp, sonyń saldarynan 2 adam ólip, 10 adam jaralanǵan.