Senator Andreı Lýkın «Nurly jer» qol jetimdi turǵyn úı salý memlekettik baǵdarlamasyn iske asyrý kórsetkishterine kúmándanatynyn jetkizdi, dep habarlaıdy Egemen.kz.
Depýtat «Nurly jerge» bólingen qarajattyń 50%-dan astamy ıgerilmegenine nazar aýdarýyn surap, Mınıstrler Kabınetiniń basshysyna saýal joldady. Baǵdarlamaǵa 873,8 mıllıard teńge bólinse, onyń tek 476,8 mıllıard teńgesi ǵana jumsalǵan. Al turǵyn úı alǵysy keletinderdiń sany kún sanap óse beretini zańdy.
«Kezekte turǵandardyń eń kóbi Nur-Sultan qalasynda tirkelgen, onda 45,2 myń adam, al Almaty oblysynda 43,3 myń adam kezekte tur», - dedi Andreı Lýkın.
Sonymen birge, Indýstrııa jáne ınfraqurylymdy damytý mınıstrliginiń málimetteri boıynsha 2017-2019 jyldar aralyǵynda elimizde «Nurly jer» baǵdarlamasy boıynsha 32,5 mln sharshy metr turǵyn úı salyndy. Alaıda, bul mólsher jetkiliksiz, dedi senator, óıtkeni 500 myńnan astam qazaqstandyq jeke páterli bolamyz degen úmitpen kezekte tur. Tizimde negizinen áleýmettik osal top azamattary, memlekettik qyzmetkerler, bıýdjettik uıymdardyń qyzmetkerleri jáne áskerı qyzmetkerler bar.
«Memlekettik baǵdarlamany iske asyrýǵa bólingen bıýdjettik qarjy kólemin jáne olardyń damý deńgeıiniń tómendigin, sondaı-aq azamattardy turǵyn úımen qamtamasyz etýdiń asyra baǵalanǵan kórsetkishterin eskere otyryp, bólingen qarjynyń paıdalanylýy, qoldanýǵa berilgen turǵyn úıdiń bólinýi jáne memlekettik baǵdarlamany iske asyrýdyń turǵyn úıge muqtaj azamattardyń sanyn azaıtýǵa naqty áseri týraly aqparat berýińizdi suraımyn», - dedi Andreı Lýkın.
Búgingi kúni Qazaqstannyń turǵyn úı qorynyń aýdany 347,4 mln sharshy metrge, kóp páterli turǵyn úılerdiń sany 78402 danaǵa jetti.