“Nur Otan” HDP janyndaǵy Jemqorlyqpen kúres jónindegi respýblıkalyq qoǵamdyq keńestiń 14-shi otyrysynda Qarjy mınıstrligindegi jemqorlyqqa qarsy jumystyń jaı-kúıi men oryndalý barysy týraly másele qaraldy. Qazaqstannyń barlyq aımaqtarymen beınekonferensııa formatynda uıymdastyrylǵan sharaǵa Qarjy mınıstrligi ókilderi, Bas prokýratýra qyzmetkerleri, bılik partııasynyń aımaqtyq fılıaldarynyń jáne mınıstrliktiń aýmaqtyq qurylymdarynyń basshylary qatysty.
Parlament Senatynyń depýtaty, Qoǵamdyq keńes tóraǵasy Oralbaı Ábikárimovtiń tóraǵalyǵymen ótken sharada alǵashqy bolyp baıandama jasaǵan Qarjy mınıstri Bolat Jámishev atqarylǵan jumystarǵa qaramastan, Qarjy mınıstrliginiń júıesinde áli de bolsa eleýli kemshilikterdiń oryn alyp otyrǵanyn atap ótti. “Biz muny jaqsy túsinemiz jáne jaýapkershilikpen qaraımyz”, dedi Qarjy mınıstri. Onyń aıtýynsha, búgingi tańda mınıstrlik jáne onyń komıtetteri qabyldaǵan sybaılas jemqorlyqtyń aldyn alý, jolyn kesý, túbegeıli joıý jónindegi sharalar jetkiliksiz bolyp otyrǵan kórinedi.
Sonymen qatar, ol 2009 jyldyń qorytyndysy boıynsha sybaılas jemqorlyq quqyq buzýshylyq jasaǵany úshin ákimshilik jáne tártiptik jaýapkershilikke tartylǵan memlekettik qyzmetshiler sany jaǵynan Qarjy mınıstrligi 4-orynda, al memlekettik satyp alý týraly zańnamany buzý faktileriniń sany jaǵynan 12-shi orynda turǵanyn aıtty.
Parlament Májilisiniń depýtaty, atalǵan keńes múshesi Nurlan Ábdirov Qarjy mınıstrligi tarapynan júzege asyrylǵan is-sharalarǵa qaramastan, jemqorlyq is-áreketterdiń báseńdemeı otyrǵanyn atap kórsetti. “Máselen, 2009 jyly 108 sybaılas jemqorlyq is-áreketteri oryn aldy. Bul 2008 jylmen salystyrǵanda 13 paıyzǵa artyq. Bul, ásirese, ortalyq memlekettik organdardaǵy jemqorlyq kórsetkishiniń joǵarylaǵanyn baıqatady. Keden organdarynda ol 62-ge, al salyq organdarynda 36-ǵa jetken”, dedi Nurlan Májıtuly óz sózinde.
Jıyn barysynda, sondaı-aq, jemqorlyqqa qatysty júrgizilgen áleýmettik zertteýlerdiń nátıjeleri shyǵaryldy.
Láıla EDILQYZY.