Búgin J.Shanın atyndaǵy Shymkent qalalyq akademııalyq qazaq drama teatrynda "QR Tuńǵysh Prezıdenti kúni" merekesine arnalǵan saltanatty is-shara ótti, dep habarlaıdy Egemen.kz.
Merekelik is-sharada elimizdiń keń baıtaq dalasy, sulý tabıǵaty, Nur-Sultan men Shymkent qalalaryndaǵy Elbasy ashqan kórikti jerler men ǵımarattar, Shymkenttiń úshinshi megapolıs ataný tarıhy jaıynda beıne rolık kórsetildi.
Shymkent qalasynyń ákimi Murat Áıtenov saltanatty jıynda kópshilikti merekemen quttyqtap, merekeniń mán-mańyzyna toqtaldy.
– Sizderdi 1 jeltoqsan – Qazaqstan Respýblıkasynyń Tuńǵysh Prezıdenti kúnimen shyn júrekten quttyqtaımyn! Bul barsha qazaqstandyqtar úshin shyn mánindegi jalpyulttyq merekege aınaldy. Bul aıtýly merekeniń máni zor, mańyzy erekshe. Olaı bolatyny, bul babalar armany – Táýelsizdikke jol ashqan aqjoltaı kún. Osydan 29 jyl buryn, ıaǵnı 1991 jyldyń 1 jeltoqsanynda elimiz alǵash ret búkilhalyqtyq saılaý negizinde óziniń tuńǵysh Prezıdentin saılaǵan bolatyn. Osylaısha Prezıdenttik ınstıtýtty engizý arqyly Qazaq memleketi óz tarıhyndaǵy jańa dáýirge qadam basty. Táýelsizdigin jarııalap, derbes el boldy. Mine, sodan beri elimizdiń Tuńǵysh Prezıdenti, Elbasy Nursultan Nazarbaevtyń basshylyǵymen qysqa merzimde bir ǵasyrǵa begisiz joldy júrip ótip, álemde ózindik orny bar irgeli elge aınaldyq.
Elbasy halyq bıligi men táýelsizdik qaǵıdattarynyń sımvoly ári kepili. Búkil álem moıyndaǵan jahandyq bitimgerlik bastamalarynyń avtory. Ońtústiktiń qaqpasy ispettes Shymkentke respýblıkalyq mańyzy bar qala mártebesin berip, elimizde mıllıonnan astam turǵyny bar jańa megapolıstiń paıda bolýyna jol ashty. Elbasynyń osy sheshiminiń arqasynda súıikti qalamyz Shymkent eki jyldyń ishinde shyraıy kirip, shynaıy órkendeýge bet aldy. Qysqa merzim ishinde qyrýar sharýalar atqaryldy. Ekonomıkasy nyǵaıdy, áleýetti artty. Elbasynyń kóregendigine shaharymyzdyń qazirgi damý barysy aıqyn dálel, – dedi qala ákimi. Is-shara odan ári qaraı Táýelsizdik jolyndaǵy babalardyń kúresin búgingi jarqyn kúnmen ushtastyratyn «Uly dala Amanaty» teatrlandyrylǵan kórinisimen jalǵasty.
Sondaı-aq merekelik jıynda J.Shanın atyndaǵy Shymkent qalalyq akademııalyq qazaq drama teatrynyń akterleri, Shymkent qalalyq Opera jáne balet teatrynyń solısteri, «Qazyna» bı ansambli jáne «Shymkent qalalyq mádenıet úıi» konserttik uıymynyń ánshileri óner kórsetti.