Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 2020 jylǵy 3 jeltoqsanda ótetin Senat otyrysynyń kún tártibin talqylady, dep habarlaıdy Egemen.kz.
Palatanyń jalpy otyrysynda Qazaqstan Respýblıkasy Joǵarǵy Sotynyń sýdıalaryn saılaý jáne qyzmetinen bosatý máselesi qaralady. Sondaı-aq senatorlar Májilis maquldaǵan «Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasynyń Zańyna ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine personal berý jónindegi qyzmetterdi kórsetý máseleleri boıynsha ózgerister men tolyqtyrýlar engizý týraly» zań jobalaryn qaraıdy.
Sonymen qatar Bıýroda Májilisten kelip túsken zań jobalary turaqty komıtetterge bólinip berildi.
Odan bólek, depýtattar «Jańa jaǵdaıdaǵy ekonomıkalyq damý: Qazaqstan shaǵyn jáne orta kásipkerlikti qoldaý jáne damytý salasyndaǵy memlekettik saıasatty jáne quqyqtyq retteýdi jetildirý» taqyrybyna arnalǵan Parlamenttik tyńdaýǵa daıyndyq barysyn pysyqtady. Atalǵan is-shara 2020 jylǵy 4 jeltoqsanda ótedi.