Elimiz táýelsizdik alǵaly beri Alash zııalylary týraly tarıhı-ǵumyrnamalyq zertteý eńbekteri molynan jazylyp, oqyrmanǵa kóbirek jetip otyr. Alaıda, osy ıgi isterdi nasıhattaý jaǵy kemshin túsip jatqany shyndyq desek, Astana qalalyq til departamentiniń tikeleı uıymdastyrýymen ótken “Uranym-Alash” atty ádebı kesh osy olqylyqty toltyrýǵa nıet jasaǵan sekildi. Keshte Jarylqap Beısenbaıuly, Tursyn Jurtbaı jáne Joltaı Álmashuly syndy qalamgerler ózderiniń Alash ardaqtylaryna arnalǵan shyǵarmashylyq tabystary jaıly áńgimeledi.
Qalamger J.Beısenbaıuly Sh.Ýálıhanov ómiriniń keıbir bizge belgisiz tustaryn sóz etse, fılologııa ǵylymdarynyń doktory T.Jurtbaı Alash kósemderi Á.Bókeıhanov, A.Baıtursynov, M.Shoqaı sekildi ult qaıratkerleri jaıly, olardyń tartysty taǵdyry týraly tolǵana sóıledi. Al jazýshy-dramatýrg Joltaı Álmashulynyń Maǵjan aqynnyń abaqtydaǵy sońǵy túnin sýretteıtin “Abaqty-ǵumyr” atty pesasynan úzindi kórermender nazaryna usynyldy. Bul tarıhı drama 2005 jyly Túrkistan drama teatrynda R.Seıtmetovtiń sahnalaýymen kórermenderge jol tartqan edi. Sodan bergi ýaqytta bul týyndy Qazaqstannyń kóptegen qalalaryna, sondaı-aq Qyrǵyzstan, О́zbekstan, Túrkııa elderine gastroldik saparmen baryp, ondaǵy óner súıer qaýymǵa kórsetilgen bolatyn. Dramada M.Jumabaevtyń Alashtyń ardaqty uldary, repressııa qurbandary N.Tórequlov, S.Qojanovtarmen ózara qarym-qatynasy sýrettelgen.
Rysbek ASQARULY.