Memleket basshysy Nursultan Nazarbaev «Nazarbaev ortalyǵy» jańa ǵımaratynda boldy, dep habarlady Prezıdenttiń baspasóz qyzmeti.
Memleket basshysy Nursultan Nazarbaev «Nazarbaev ortalyǵy» jańa ǵımaratynda boldy, dep habarlady Prezıdenttiń baspasóz qyzmeti.
Ǵımaratty aralaý barysynda Nursultan Nazarbaev ony qarap shyǵyp, nysannyń negizgi ólshemderimen tanysty.
Memleket basshysy qazaqstandyqtardy merekemen quttyqtap, Tuńǵysh Prezıdent kúni ózge de memleketterde – AQSh-ta, Eýropa, Azııa elderinde mereke retinde atap ótiletinin aıtty.
– Qazaqstan Parlamenti óz sheshimimen memlekettik mereke retinde bekitti. Bul kúnnen keıin mańyzdy merekeler bastalady, osydan keıin olardyń ishindegi eń mańyzdysy – Táýelsizdik kúni atap ótiletin bolady. Bul oqıǵalar ózara baılanysty. Men mandat alyp, barsha halyqtyń qoldaýyna ıe bolǵan soń onyń atynan elimizdiń táýelsizdigin jarııalaýǵa múmkindik aldym. Sondyqtan biz bul kúndi halqymyzdyń damý jáne ósip-órkendeýdiń jańa jolyna túsken kún retinde atap ótemiz. Búgin Astana men oblystarda elimizdiń azamattaryna turǵyn úıler berilýde, halyqtyń ıgiligine qyzmet etetin jańa áleýmettik nysandar iske qosylýda. Budan bólek, búgin elordada «Eko taksı» jobasynyń tusaýy kesildi, ol EKSPO-2017 kórmesine daıyndyqtyń basy bolyp sanalady. Bul Astanadaǵy ekologııalyq ahýaldy jaqsartýǵa baǵyttalǵan. Biz osy tájirıbeni Almatyǵa jáne Qazaqstannyń basqa da qalalaryna taratamyz, – dedi Nursultan Nazarbaev.
Sonymen qatar, Qazaqstan Prezıdenti «Nazarbaev ortalyǵy» ǵımaraty elordamyzdyń jańa biregeı nysany bolyp tabylatynyn atap ótti.
– Bul – kúlli álemge belgili arhıtektor Norman Fosterdiń týyndysy. Mundaı ortalyqtar álemniń kóp qalalarynda salynýda. Mysaly, AQSh prezıdentteri kitaphanalar, ortalyqtar ashyp jatady. Bul ortalyqta táýelsizdigimizdiń tarıhy, álemdik ekonomıka men saıasat jóninde zertteýler júrgiziletin bolady. Jastar otandyq tarıh salasynda jańasha bilim alady jáne tilderdi úırenetin bolady. Ǵımarat bıikti sholǵan kóz janarynyń pishini tárizdes. Men nysandy salýǵa atsalysqan qurylysshylarǵa, demeýshilerge rızashylyǵymdy bildirgeli keldim. Bul ǵımarat memleket qarajatyna emes, jeke kásipkerlerdiń qarjysyna salyndy. Barshańyzdy osynaý merekemen quttyqtaımyn, qazaqstandyq ár otbasyǵa ıgilik jáne tabys tileımin, – dedi Memleket basshysy.
Buǵan qosa, ǵımaratty aralaý barysynda Nursultan Nazarbaevqa Memleket basshysynyń qazirgi zamanǵy Qazaqstannyń qalyptasýy men damýyna eleýli septigin tıgizgen, arnaıy úlgimen rásimdelgen tarıhı jarlyqtary kórsetildi.
Kópfýnksıonaldy ǵımarattyń aýmaǵy – 28 myń sharshy metrden astam, 9 qabattan turady.
Kitaphana jalpy qory 460 myń birlikti saqtaýǵa eseptelingen, olardyń 200 myńǵa jýyǵy – jabyq qor.