Tórt jylǵa sozylǵan qanquıly Uly Otan soǵysynyń aýyrtpalyqtaryn ótkergen, eki ǵasyr kýágeri, eki formasııada ómir súrip, oǵan taǵdyrlas bolǵan aǵa urpaq ókilderi sol bir kúndi eshqashan umyta almaıdy. Ol 1991 jyldyń 1 jeltoqsany bolatyn. Táýelsizdiktiń jarqyrap atyp kele jatqan nurly tańyna senim artqan Qazaqstan halqy birinshi ret óz eli Prezıdentiniń saılaýyna 98,7 paıyz qatysty. Zor maqtanyshpen qazaq halqynyń Tuńǵysh Prezıdenti bolyp Nursultan Ábishuly Nazarbaev saılandy. Jurttyń qýanyshy men rızashylyǵy sonshalyq, saılaý búkilhalyqtyq merekege aınaldy. Biletin-bilmeıtindikterine qaramastan, jurt birin-biri jyly shyraımen quttyqtaýda boldy.
Tórt jylǵa sozylǵan qanquıly Uly Otan soǵysynyń aýyrtpalyqtaryn ótkergen, eki ǵasyr kýágeri, eki formasııada ómir súrip, oǵan taǵdyrlas bolǵan aǵa urpaq ókilderi sol bir kúndi eshqashan umyta almaıdy. Ol 1991 jyldyń 1 jeltoqsany bolatyn. Táýelsizdiktiń jarqyrap atyp kele jatqan nurly tańyna senim artqan Qazaqstan halqy birinshi ret óz eli Prezıdentiniń saılaýyna 98,7 paıyz qatysty. Zor maqtanyshpen qazaq halqynyń Tuńǵysh Prezıdenti bolyp Nursultan Ábishuly Nazarbaev saılandy. Jurttyń qýanyshy men rızashylyǵy sonshalyq, saılaý búkilhalyqtyq merekege aınaldy. Biletin-bilmeıtindikterine qaramastan, jurt birin-biri jyly shyraımen quttyqtaýda boldy.
Sol kúnderi L.B.Goncharov atyndaǵy Almaty jol-qurylys ınstıtýtynyń oqytýshylary – bizder stýdentterdiń Prezıdent saılaýyna qatysqandaryna, derbestikke qol jetken elimizdiń keleshegine asa bir rızashylyq tanytqan sezimderine, oqýǵa degen yntalaryna tánti boldyq. Árqashan jastarymyzdyń qýanyshyn kórgennen artyq baqyt joq ekenine barlyq kezde kózimiz jetip keledi. О́ıtkeni, adamnyń nár beretin tamyry da, sán beretin japyraǵy da keleshek urpaq emes pe?!
Endi biraz sheginis jasap, sol jyldardaǵy saıası-áleýmettik jaǵdaılarymyzǵa kóz jibereıikshi. 1991 jyly jeltoqsan aıynda Keńes Odaǵy dep atalatyn, 70 jyl ústemdik ornatqan derjava ydyrap, tarıhı sahnadan ketti. 16 odaqtas respýblıka árqaısysy ár jaqqa alańdady. Biri musylmandyq odaqqa, biri Eýropaǵa kóz tikti. Tehnıka jabdyqtary, qarajat qory túgeldeı derlik Reseı zaýyttaryna, Máskeý ortalyǵyna baǵynyshty bolǵandyqtan, elimizde óndiris toqtaı bastady.
Onsyz da kıse kıimge, ishse tamaqqa tapshylyqpen kúneltken jerimizde et, sút taǵamdaryna, bala-shaǵanyń kıim-keshegin satyp alýǵa saǵattap kezekterde turatyn boldyq.
Bir qolǵa mólsherlengen zattardy ǵana alatyn edik (bir bótelke aıran, 1-2 páshke grýzın shaıy, bir taýyq, t.t.). Dúkender sóresi bos qaldy. Aýyl adamdary ala sómke arqalap, qalalardy jaǵalap nápaqasyn tabýǵa kiristi... Qysqasha aıtqanda, Qazaq eli japan túzde jalǵyz qalǵan otaýdaı kún keshken kez edi. Osyndaı alasapyran kezinde bolatpen birge qaınap shynyqqan, bala kezinen kópshilik jumystardyń lıderi bolyp qalyptasqan, oblystyq, respýblıkalyq partııa komıtetterin basqarǵan Nursultan baýyrymyz qazaqtyń baǵyna Kók Týymyzdy qolyna alyp, eshbir el basynan keshpegen qyrqasy men belesi kóp jolmen elimizdi bastap keledi.
«Almas kezdik qyn túbinde jatpaıdy» degen osy. «Adamda jaqsy qasıet bolmasa baq ta, baqyt ta qonbaıdy», degen eken Balasaǵun babamyz. El múddesine qaltqysyz qyzmet etip, kúni-túni tynym tappaı jar qulaǵy jastyqqa tımeı erendik pen tereńdik, kemeldik pen kóregendik tanytyp júrgen asyl azamatymyzǵa Alla jar bolsynnan basqa aıtarymyz joq. Táýelsizdiktiń arqasynda tarıhı az ýaqyt ishinde álem tanyǵan damýshy memleketterdiń birine aınaldyq.
Qazaq jeriniń asty da, ústi de tunyp turǵan qazyna. Bizde ken baılyǵy bar. Bizde el baılyǵy da bar. Ol – ǵylym men bilim. Ol – jańa tehnologııa. Ol – ekonomıkany ártaraptandyrý, ol EKSPO-2017. Bizde rýh baılyǵy bar. Onyń basty ólshemi tatýlyq, tynyshtyq pen turaqtylyq, eńbekqorlyq. Tarıhı az ýaqyt ishinde kórshiles jáne alys qurlyqta ornalasqan eldermen terezesi teń dıplomatııalyq qarym-qatynas ornatyp, ár memlekettiń tórinen elshiligimizdi ashtyq. Birikken Ulttar Uıymyna múshe boldyq. Ekonomıkamyz qarqyndy damyp, dúnıejúzilik daǵdarystan súrinbeı ótip, aldyńǵy qatarly 50 eldiń sanatyna endik. Eýropadaǵy qaýipsizdik jáne yntymaqtastyq uıymyna basshylyq jasadyq. Alar asýlarymyz áli de az emes ekenine kámil senemiz.
Aryn arqalap, namysyn qamshylap, urpaqtarǵa uıytqy bolyp kele jatqan qarttardyń maqtan tutary kóp. Al onyń ishinde: ásem qala, alyp qala kıeli shahar Almaty Qazaqstan táýelsizdiginiń altyn besigi bolǵany, osy qalada 1991 jyly 1 jeltoqsanda Tuńǵysh Prezıdentimiz – Elbasy N.Á.Nazarbaevtyń taqqa otyrǵany belgili. Al biz – aǵa urpaq elimizdiń amandyǵyna, jurtymyzdyń tynyshtyǵyna tilek aıtyp, saıyn dala Saryarqa tósindegi, Eýrazııa kindigindegi Astananyń jasampaz isterine, HHI ǵasyr Qazaqstannyń altyn ǵasyryna aınalatynyna batagóı bolyp kele jatyrmyz.
Bıjamal RAMAZANOVA,
Qazaqstan Respýblıkasy
Ortalyq ardagerler keńesiniń múshesi,
Almaty qalasynyń qurmetti azamaty.
ALMATY.