Juqpaly indetke shaldyqqandar úshin emdeý mekemeleriniń tıimdiligi edáýir artty. Oblysta 40 ınfeksııalyq stasıonar daıyndalyp, tolyq jabdyqtalǵan 6 myńnan astam tósektik oryn uıymdastyryldy.
Bıyl aqpannan beri naýqastarǵa arnalǵan tósektik oryn sany 12 esege, reanımasııalyq tósektik oryn sany 10 esege artqan. Oblystyq densaýlyq saqtaý basqarmasy mamandarynyń málimetinshe, ınfeksııalyq bólimshelerdiń barlyq pasıenti oksıgenoterapııamen tolyq qamtamasyz etilgen. Búginde aýyr naýqastar úshin ımmýndyq plazmanyń 3 myńnan astam dozasy daıyndaldy. О́zgeniń ómirin qutqaryp qalý úshin plazma tapsyrýǵa nıet bildirip jatqandar da kóp. Ázirlengen plazmadan 150 pasıentke 309 doza quıylǵan eken.
Sonymen qatar dári-dármekter men jeke qorǵanys quraldarynyń turaqtandyrý qory quryldy. Emdeýdiń tıimdiligi úshin koronavırýs ınfeksııasynyń jeńil jáne ortasha aýyrlyǵy bar 6 200 naýqasty osy dári-dármekpen qamtamasyz etý esebinen favıpıravır preparaty satyp alyndy. Preparat 12 qarashadan bastap pasıentterdiń kelisimimen oblys aýrýhanalarynda qoldanysqa engen. Táýlik boıy jáne demalyssyz 15 kompıýterlik tomograf jumys istep tur. 1 jeltoqsannan bastap qosymsha 3 jańa KT apparaty pasıentterdi dıagnostıkalaýdy bastaıdy.
Aıta keterligi, aýyl turǵyndaryn ýaqtyly medısınalyq kómekpen qamtamasyz etý úshin jumys istep turǵan 6 jyljymaly medısınalyq keshenge taǵy 10 jańa keshen qosyldy. Josparǵa sáıkes medısınalyq jabdyqtarmen tolyq jınaqtalǵan jedel járdem kóliginiń parki 216 avtokólikpen tolyǵýy tıis. Onyń 88-i qazirdiń ózinde jumys istep tur, qalǵan 128 kólik 10 jeltoqsanǵa deıin jetkiziledi. Jalpy, óńirdegi jedel járdem kólikteriniń sany 2,5 esege kóbeıdi.
Koronavırýs jaǵdaıyn baqylaýda ustaý úshin KVI oshaqtaryn oqshaýlaý ortalyǵy quryldy. Atalǵan ortalyq bes sıfrly modýldy biriktirip, medepıdbrıgadalardyń jumysyn úılestiredi. Mundaı júıe ınfeksııanyń taralýyna qarsy kúres boıynsha shuǵyl sharalar qabyldaýdy jedeldetýge, juqtyrǵan jáne baılanysta bolǵan adamdar týraly aqparattar alýǵa, emdeý barysyn jáne karantındik shekteýlerdiń saqtalýyn qadaǵalaýǵa múmkindik beredi.
Shyǵys Qazaqstan PTR zerthanalardyń sany boıynsha jetekshi oblystardyń qatarynda. Pandemııa bastalǵaly PTR ádisimen 350 myńnan astam adam tekserýden ótti. COVID-19 vırýsyn ýaqtyly dıagnostıkalaý úshin jergilikti bıýdjet esebinen qýattylyǵy táýligine 7 myń synamaǵa deıin jetetin qosymsha 7 zerthana ashylǵan.
Jalpy, pandemııamen kúres kezinde óńirdiń densaýlyq saqtaý salasyna qajetti jabdyqtar satyp alýǵa jáne negizgi quraldardy jańartýǵa 22 mlrd teńgeden astam qarajat jumsaldy.
Shyǵys Qazaqstan oblysy