Búgin, Astana qalasyndaǵy «Nursáýlet» bıznes ortalyǵynyń májilis zalynda «Jasyl aımaq» respýblıkalyq memlekettik kásipornynyń bas dırektory Jumataı Súıindikov óziniń aıyptalýshy ulyna qatysty buqaralyq aqparat quraldary ókilderine baspasóz máslıhatyn ótkizdi. Bul týraly Egemen.kz tilshisi habarlady.
Osyǵan deıin birqatar basylymdarda J. Súıindikovtiń ulyna qatysty biraz habarlar jarııalanǵan bolatyn. Solardyń keıbireýlerinde «beldi azamattyń «altyn uly» qyz zorlady dep te jazyldy. Jarııalanǵan aqparǵa túsinikteme berýge kelgen J. Súıindikov óz maqsaty jaıynda ashyp aıtty. «Men, birinshiden, elimizdiń qarapaıym qyzmetkerimin. Senseńizder, áli kúnge deıin shetelge baryp dem alǵan emespin. Ýaqytymnyń bári elordany kórkeıtýge arnalyp jatyr. Búginge deıin bas qala aınalasyndaǵy 65 myń gektar jerdi ormandy alqapqa aınaldyrdyq. Basty mindet - qorshaǵan ortanyń ekologııalyq tazalyǵyn saqtaý. Osyndaı mindetterdi alǵa qoıǵan azamatqa sońǵy kezde aıtylǵan jónsiz aıyptaýlar meniń baspasóz máslıhatyn ótkizýime túrtki boldy. Árkimniń ary qymbat. О́zim jáne otbasym atyna aıtylǵan jańsaq pikirler jan-dúnıemizdi jegideı jedi. Al ulym aıypty bolsa, ony zań organdary jazalaıdy. Sondyqtan jýrnalısterden bul másele týraly jazǵanda, ádildikke júginýdi suraımyn. Al men istiń aq-qarasyna deıin jetý úshin bar bilimim men tájirıbemdi aıanbaı jumsaımyn», - dedi ol sóz basynda.
Esterińizde bolsa, 2011 jyldyń sáýirinde J. Súıindikovtiń uly Murat pen onyń qasynda bir páterde bolǵan Murat Túsipov qyz zorlady degen aıyppen quqyq qorǵaý qyzmetkerleriniń qolyna túsken. Aıyptalýshy jaqtyń aıtýyna qaraǵanda, quqyq qorǵaý qyzmetkerleri alǵashynda Murat Súıindikovti 4 kúnge qamap, eshqaıda ketpeý qolhatymen bosatyp jibergen. Sosyn bıylǵy jyly qaıtadan qamaýǵa alady. Osy aralyqta birneshe sot otyrysy bolyp, sońǵysynda 2013 jyldyń 15 sáýirinde Saryarqa aýdandyq sotynyń sýdıasy Murat Súıindikovti - 6 jylǵa, al onyń qasynda bolǵan aıypker Murat Túsipovti 8 jylǵa bas bostandyǵynan aıyrýǵa úkim shyǵarady.
Alaıda, baspasóz máslıhatynda J. Súıindikov pen ulynyń qorǵaýshysy Qaırat Kúspekov appelıasııalyq sotqa qaıtadan shaǵym túsiretinin málimdedi. «Alǵashqy júrgizilgen saraptamada aıǵaqty zattardan qyzdy zorlaý belgisi anyqtalmaǵan. Al 5 aıdan soń jábirlenýshi zań oryndaryna óziniń ishkıimin ákelip kórsetken. Osy kezdegi jasalǵan saraptama qaǵazynda basqa nárse aıtylady. Mundaı kereǵar tujyrymmen biz kelise almaımyz», - deıdi qorǵaýshy Q. Kúspekov.
Endi qozǵalyp otyrǵan bar kiltıpan osy saraptamalarǵa qatysty sekildi. Aıyptalýshynyń ákesi J. Súıindikov áńgime retinde balasynyń jazaǵa tartylýyn ózin jek kóretinderdiń is-áreketimen baılanystyrdy. Al kúdikti M. Súıindikovtiń týysy Erkebulan Súıindikov jábirlenýshi qyzdyń sózinde turmaǵanyn aıtty. «Seniń baýyryń meni zorlady. Meniń ákem Bas prokýratýrada qyzmet aqtarady. Sondyqtan bul isti aıaqsyz qaldyrmaıdy. Istiń jabylǵanyn qalasańyz, meniń qolyma 800 myń dollar ustatasyz. Olaı bolmaǵan jaǵdaıda, baýyryńyz qamalady dep jábirlenýshi qyz úreıimizdi ushyrdy», - dedi ol.
Osy qońyraýdan keıin Erkebulan jábirlenýshimen kezdesip, oǵan minip júrgen «Toıota» máshınesin notarıýs arqyly beredi. Jábirlenýshi qyz kóliktiń qunyn 25 myń dollarǵa baǵalapty. Al aqshanyń qalǵan bóligi - 5 myń dollardy Erkebulan qolma-qol bergen. Biraq jábirlenýshi osylardy alyp alǵasyn, ishki ister departamentine qaıta aryz jazǵan.
Baspasóz máslıhatynyń sońynda «Shańyraq» respýblıkalyq qoǵamdyq birlestiginiń basqarma tóraǵasy Mahambet Ábjan jýrnalısterge myna jaıdy basa aıtty: «Árkimniń qorǵanýǵa quqy bar. Degenmen, jeke basqa jónsiz kir jaǵýǵa bolmaıdy. Sol sebepti Murat Súıindikovtiń ákesi ádildikke júgingeli otyr. О́ıtkeni, qorǵaýshylardyń sózinen málim bolǵanyndaı, jábirlenýshi qyzdyń ishkıim túsine baılanysty aıtyp kelgen pikirleri bir-birimen sáıkes kelmeıdi. Ekinshiden, bastapqy saraptamada zorlyq belgisiniń bolmaǵany kórsetilgen».
Jıynda aıyptalýshy jaqtyń aıtqan ustanymy - ádildiktiń túbine jetý. Sondyqtan biz ázirge naqty qorytyndy jasaı almaımyz. Bul rette jábirlenýshi qyzdyń óz pikirin aıtýǵa da quqy bar...
Baqytbek Keneshuly.
Derekkóz: «Egemen.kz».