Almaty qalasynda otandyq jáne halyqaralyq bıznes qaýymdastyqtyń ókilderi men bankırler, qarjy-ekonomıka salasynyń bilgir mamandary bas qosqan I Almaty ınvestısııalyq forýmy óz jumysyn bastady.
Almaty qalasynda otandyq jáne halyqaralyq bıznes qaýymdastyqtyń ókilderi men bankırler, qarjy-ekonomıka salasynyń bilgir mamandary bas qosqan I Almaty ınvestısııalyq forýmy óz jumysyn bastady.
Alqaly jıynǵa el Úkimetiniń basshysy Serik Ahmetov arnaıy qatysyp, forým qonaqtarynyń aldynda Qazaqstannyń ekonomıkalyq ahýaly men qol jetkizgen tabystary, ınvestor tartýǵa jasalyp otyrǵan tolymdy baǵdarlamalary týraly aıtyp berdi. Sondaı-aq, bul forým Qazaqstannyń, onyń ishinde Almaty qalasynyń ınvestısııalyq ahýalyn jaqsartýǵa úlken úles qosatyndyǵyn aıta kele, búgingi tańda elimizde jınaqtalǵan tikeleı shetel ınvestısııasy kóleminiń jan basyna shaqqanda 6,5 myń AQSh dollaryn qurap otyrǵanyn málimdedi.
«Bul kórsetkishterge makroekonomıkalyq turaqtylyqty qamtamasyz etý jáne qolaıly ınvestısııalyq ahýal qurý boıynsha júıeli sharalardyń arqasynda qol jetkizildi. Búgingi tańda Qazaqstanda 8 myńǵa jýyq kásiporyn shetel kapıtalynyń qatysýymen belsendi jumys isteýde. Onyń ishinde «Fortune-500» jáne «Global-2000» tizimine engen iri transulttyq kompanııalar bar. Ústimizdegi jyly Qazaqstanda avtokólik qurastyrý boıynsha «Toıota» jáne «Pejo» kompanııalarymen yntymaqtastyq týraly memorandýmdarǵa qol qoıyldy» dedi Serik Ahmetov.
Memleket basshysynyń ınvestorlarǵa bıznesti júrgizý úshin qolaıly jaǵdaılar jasaýǵa aıryqsha kóńil bóletinine toqtalyp, qoldanystaǵy zańnamada qural-jabdyqtardy ımporttaý kezinde kedendik salyqtan bosatý, jer telimderi túrindegi granttar bólý, jekelegen salyqtar boıynsha jeńildikter jasaý sekildi birqatar sharalardyń qarastyrylǵanyn atap kórsetti. Shetel ınvestorlarynyń baryp-kelý jaǵdaılary jaqsaryp, ınvestorlyq vızalardy alý merzimderi qysqarǵanyn, Qazaqstannyń barlyq óńirlerinde ınvestorlar úshin jobalardy júzege asyrýdy bastaýǵa qajetti aqparattarmen qamtamasyz etetin arnaıy qyzmet kórsetý ortalyqtary qurylǵanyn málimdedi.
Investısııalardy tartýda jáne bıznes úshin qolaıly jaǵdaılar jasaýda memleket pen ınvestor arasyndaǵy tikeleı til qatysýlardyń mańyzyn ataı otyryp, Úkimet basshysy bul oraıda QR Prezıdenti janyndaǵy Shetel ınvestorlary Keńesiniń tıimdiligine de toqtaldy. Keńestiń ınvestısııalyq ahýaldy jaqsartý boıynsha jáne vedomstvoaralyq jumys toptarynyń tabysty qyzmetterin atap ótti. Onyń aıtýynsha, 2013-2014 jyldarǵa arnalǵan Dúnıejúzilik ekonomıkalyq forýmda jarııalanǵan ınvestorlardyń quqyqtaryn qorǵaý ındeksine sáıkes, Qazaqstan birqatar Eýropa elderin basyp ozyp 10-shy oryndy ıelengen.
Prezıdenttiń «Qazaqstan-2050» Strategııasy sheńberinde álemniń damyǵan 30 eliniń quramyna ený mindetin alǵa qoıǵanyna toqtalǵan S.Ahmetov «bul maqsatqa jetý úshin ınvestısııalyq saıasatty odan ári damyta túsý máselesiniń negizgi tetik bolyp tabylatynyn» atap kórsetti.
Premer-Mınıstr forýmǵa qatysýshylarǵa jańa bastamalardy júzege asyrýda tabys tilep, Qazaqstan Úkimeti esiginiń áriptestik pen dıalog úshin árqashan ashyq ekenin jetkizdi.
Forýmnyń saltanatty ashylýynda sóz alǵan qala ákimi Ahmetjan Esimov shıkizattyq óńir bolmasa da Almaty qalasy óńirlik ishki jalpy ónim kólemi boıynsha respýblıkada birinshi orynda nyq kele jatqanyn, naqtylaı eseptegende 308 mıllıard dollardyń ónimin óndiretin 1,5 mıllıonnan astam halqy bar Almatyda ishki jalpy ónim jan basyna shaqqanda 25 myń dollardy quraıtyndyǵyn jetkizdi. Bul ortasha statıstıkalyq kórsetkishi jaǵynan Chehııa, Polsha, Bolgarııa, Rýmynııa jáne taǵy basqa elderden joǵary. Ahmetjan Smaǵululynyń sózine qaraǵanda, Almaty úshin shaǵyn jáne orta bıznestiń mańyzy erekshe. Eldegi árbir tórtinshi kásipker óz qyzmetin Almatyda júzege asyrady. Salyqtyq túsimderdiń 60 paıyzy – shaǵyn jáne orta bıznestiń úlesinde. Almatyda ınvestorlar úshin tartymdy 3 baǵyt bar. Olar – aqparattyq tehnologııalar parki, Alataý aýdanyndaǵy óndiristik aımaq pen týrızm.
«Kapıtalıstik qoǵamda bári jeke tabysqa negizdelgen. Alaıda, qoǵam músheleri bir-birine kómektesýdi basty orynǵa qoımaı kóptegen máseleler sheshimin tappaıdy» degen pikirdi alǵa tartqan Nobel syılyǵynyń ıegeri, bangladeshtik bankır ári álemdik ekonomıka ǵylymdarynyń professory Muhammed Iýnýs qoǵam tek jeke paıdaǵa ǵana negizdelmeýi kerektigin, memleket kóptegen máselelerde óz tarapynan kómek qolyn sozyp, qoǵam tutastaı ózara qoldaý kórsetken kezde ǵana ilgeri basý men tabysqa keneletindigin tilge tıek etti.
Munan ózge, eki kúnge sozylǵan I Almaty ınvestısııalyq forýmynda Ulybrıtanııa, Fransııa, Gonkong, AQSh, Italııa, Kanada, Taıvan, Ispanııa, Reseı elderinen kelgen qarjygerler men ekonomıster baıandama jasap, álemdik ekonomıkanyń baǵytyn boljaıtyn saraptamalyq jumystarymen bólisti.
Qanat ESKENDIR,
«Egemen Qazaqstan».
ALMATY.