"YDD Corporation" ferroqorytpa zaýyty eksporttyq áleýetti damytý jumystaryn belsendi jalǵastyrýda. Osy jyly ónimdi satý geografııasy 15 elge keńeıtildi. Osylaısha, qazirgi ýaqytta zaýyt álemniń 37-den astam eline ónim eksporttaıdy, dep habarlaıdy Egemen.kz.
Búginde óndiris oshaǵy joǵary sapaly ferrosılısıı óndiretin úshinshi peshti iske qosýda. Úshinshi peshtiń qýaty 85,5 MVA quraıdy, ony paıdalanýǵa engizýmen ferroqorytpa zaýytynyń jalpy óndiristik qýaty 30% - ǵa artyp, jylyna 180 myń tonnany quraıdy. Búkil álemdegi jaǵdaıǵa qaramastan, peshti iske qosý josparlanǵan kestege sáıkes júrgizildi. Kompanııa COVID-19 pandemııasy kezinde jumys kestesin vahtalyq ádiske kóshirip, barlyq qajetti jaǵdaı jasaǵanynyń arqasynda qazirgi óndiris kólemin saqtap qaldy.
Zaýyttyń ónimi-joǵary sapaly ferrosılısıı (FeSi75) elektr tehnıkalyq, serippeli, tottanýǵa qarsy jáne ystyqqa tózimdi bolattardy balqytý kezinde qyshqyldandyratyn jáne qospalaıtyn qospa retinde paıdalanylady. Shyǵarylatyn ónim ár túrli jáne kremnııdiń paıyzdyq mólsherine baılanysty 45% - dan 75% - ǵa deıin ózgeredi. Untaqtaý-suryptaý kesheniniń jumysynyń arqasynda ónim fraksııalardyń keń aralyǵynda– 0-den 315 mm-ge deıin shyǵarylady. Zaýytta gaz tazalaýdyń jańa, zamanaýı júıesi engizilgen. Bul keshen óndiristen shańdy ustap, ony janama ónim – mıkrokremnezemge aınaldyrady, sodan keıin ony joǵary sapaly sement pen beton shyǵarý úshin paıdalanýǵa bolady. Jobadaǵy otandyq ónimniń úlesi 95 paıyzdan asady.
Esterińizge sala keteıik, "YDD Corporation" JShS zaýytynyń ashylýy 2019 jyldyń shilde aıynda ótti. Zaýyt jańa tehnologııalardy qoldana otyryp salynǵan, óndiris prosesi tolyǵymen avtomattandyrylǵan. Joba IIDMB sheńberinde QDB-nyń qaryz qarjylandyrýyn tarta otyryp, qazaqstandyq jáne eýropalyq ınvestorlardyń jeke qarajaty esebinen iske asyryldy.