2020 jyldyń 11 aıynda Aqtóbe oblysynyń Polısııa departamenti 551 jol-kólik oqıǵasyn tirkedi, dep habarlaıdy Egemen.kz
Jol-kólik oqıǵasynyń saldarynan 88 adam qaza taýyp (2019 j. – 99), 732 adam jaraqat aldy. Jol-kólik oqıǵalarynyń edáýir bóligi eldi mekenderde (370), respýblıkalyq jáne halyqaralyq mańyzy bar joldarda (109) oryn alady. Onda jalpy 55 adam qaza taýyp, 162 adam jaraqat alǵan.
Aqtóbe oblysynyń aýmaǵynda 2020 jylǵy 9-28 qarasha aralyǵynda qaıǵyly oqıǵaǵa ákep soqqan jol-kólik oqıǵalarynyń 15 faktisi anyqtalyp, saldarynan 16 adam qaza tapty.
– Bul kólik quralyn júrgizýshilerdiń meteorologııalyq jáne jol jaǵdaılaryn eskermeıtindigin, qarsy qozǵalys jolaqtaryna shyǵatyndyǵyn, qozǵalys qaýipsizdigine mán bermesten basyp ozý manevrin jasaıtyndyǵyn kórsetedi, – dep atap ótti departament bastyǵy Atyǵaı Arystanov.
Osyǵan baılanysty Polısııa departamenti júrgizýshilerden joldarda muqııat bolýdy suraıdy, sebebi oılanbaı áreket etýdiń saldarynan bógde adamdar japa shegýi múmkin.