Aqtóbe qalasynyń óńirlik kommýnıkasııalar qyzmetinde oblystyq ekologııa departamentiniń basshysy Nurjan Aqqul ekologtar shoshqa fermasynyń jumysynan birneshe zańsyzdyqty anyqtap, aıyppul salǵanyn málimdedi, dep habarlaıdy Egemen.kz
Eske sala keteıik, 19 qarashada Bestamaq aýylynyń 80-nen astam turǵyny shoshqa fermasyn jabýdy talap etip, narazylyqqa shyqqan bolatyn. Taralǵan vıdeoǵa qaraǵanda, turǵyndardyń kásiporyndy jabýdy talap etkenin ańǵarýǵa bolady. Olardyń aıtýynsha, shoshqa qaldyǵy ózen sýyna aǵyp jatyr. Taǵy bir vıdeodan jol talǵamaıtyn kólik narazy toptan qashyp, qaqpany qıratyp ótkenin kórýge bolady. Tekserý barysynda búlingen jer kólemi anyqtalyp, shyǵyn kólemi 14,2 mln teńge dep esepteldi. Sonymen birge qylmystyq is qozǵaldy.
"Sonymen birge tekserý kezinde 2018-2019 jyldary aralyǵynda sharýashylyqta qorshaǵan ortany qorǵaý zańdylyǵy saqtalmaǵany belgili boldy. Mal basynyń sany negizsiz ósken. Joba boıynsha 40 myń bas, al shyn máninde 50 myń bastan astam shoshqa baqqan. Aǵyndy sý Baıbaqty ózeniniń arnasyn lastaǵan. Seriktestik Ekologııa kodeksin saqtamaı, Ákimshilik quqyq buzý kodeksi boıynsha úsh is qozǵaldy. Barlyǵy 7 mıllıard teńgeden astam shyǵyn eseptelip, aıyppul salyndy. Kásipker zań boıynsha 1 aıda tóleýi tıis. Eger tólemese, bul is te sotqa joldanady", dedi oblystyq ekologııa departamentiniń basshysy Nurjan Aqqul.
Nusqama merziminde oryndalmasa, kásiporynnyń sharýashylyq qyzmetin ýaqytsha toqtatý týraly sotqa talap-aryz joldanady.