Jambyl oblysynyń Áljan ana aýylynda jańa sporttyq-saýyqtyrý kesheni ashyldy. Munda shaǵyn fýtbol, voleıbol, basketbol, erkin kúres, boks, thekvondo jáne dzıýdo sııaqty birneshe sport seksııalary jumys isteıdi, dep habarlaıdy Egemen.kz.
«Samruk-Kazyna Trust» áleýmettik jobalardy damytý qory «Samuryq-Qazyna» AQ-nyń «Meniń Elim» áleýmettik ınvestısııalar baǵdarlamasy aıasynda aýdany 1400 sharshy metrden asatyn sport kesheniniń qurylysyna qarajat bóldi. Munda túrli sporttyq is-sharalar, aýdandyq jáne oblystyq deńgeıdegi jarystar, sondaı-aq jattyǵý jıyndary ótedi. Keshenge úlken arena, ámbebap zal, boks jáne kúres zaly jáne 4 kıim aýystyratyn bólme kiredi.
«Memleket basshysy buqaralyq sportty damytýǵa úlken kóńil bóledi. Bizdiń oblysta 13 dene shynyqtyrý jáne saýyqtyrý kesheniniń qurylysy júrgizilýde, onyń tórteýi Qordaı aýdanynyń aýyldarynda. Áljan ana aýylynda jańa sport kesheniniń ashylýy salaýatty ómir saltyn ustanýǵa yqpal etetinine senemiz. Endi aýyldyń uldary-qyzdary da, ózge turǵyndar da aýdan ortalyǵyna barýǵa ýaqyt pen qarajat jumsamaı, jaqyn jerdegi keshende súıikti sport túrlerimen aınalysa alatyny qýantady», - dep atap ótti Berdibek Saparbaev aýyl turǵyndaryn aıtýly oqıǵamen quttyqtaý sózinde.
Sondaı-aq, sport kesheniniń ashylý saltanatyna Jambyl oblysynyń týmasy, IVA boıynsha kásibı bokstan álem chempıony, Azııa chempıony, Qazaqstannyń birneshe dúrkin chempıony Marat Mázimbaev ta qatysty. Kásipqoı sportshy jaqyn arada osy tamasha keshenniń qabyrǵasynan táýelsiz Qazaqstannyń ánuranyn álemdik arenada shyrqatatyn olımpıada jáne álem chempıondary shyǵatynyna senim bildirdi.
Barlyq sport zaldary qajetti qural-saımandarmen jabdyqtalǵan, onyń ishinde boks rıngi ornatylǵan, kúres maty jáne jamylǵy, boks sómkesi jáne basqa da trenajerlar satyp alynǵan. Munda jergilikti Balalar men jasóspirimder sport mektebiniń 120 oqýshysy 6 jattyqtyrýshymen birge jattyǵatyn bolady.
Aıta keteıik, ǵımarat pandýstarmen jáne arnaıy dárethanalarmen jabdyqtalǵan. Sonymen qatar, munda alǵashqy medısınalyq kómek kórsetý úshin dári-dármektermen jabdyqtalǵan medısınalyq kabınet bar.
Bul «Samruk-Kazyna Trust» Áleýmettik jobalardy damytý qorynyń «Samuryq-Qazyna» AQ kompanııalar toby atynan iske asyryp jatqan Jambyl oblysyndaǵy alǵashqy joba emes. Osylaısha, 2020 jyly óńirde ámbebap sport alańdary ashyldy, Qordaı aýdanynda bilim alýynda erekshe qajettilikteri bar balalarǵa arnalǵan psıhologııalyq-pedagogıkalyq qoldaý kabıneti men resýrstyq ortalyq ashylady dep kútilýde. Sonymen qatar, jaqyn arada Tarazda Elbasynyń «Qamqorlyq» bastamasy aıasynda ońaltý ortalyǵy jáne múgedek balalarǵa arnalǵan ınklıýzııany qoldaý kabıneti ashylady.