Ulttyq Bank bıyl qyrkúıek aıynda «Baspana Hıt» baǵdarlamasy boıynsha jańa ózgeristerdi bekitken bolatyn. Baǵdarlamanyń jańa talaptaryna sáıkes Qazaqstan azamattary ekinshi deńgeıdegi banktiń jobasy boıynsha úlestik qatysý sheńberinde nemese turǵyn úı qurylysynyń jalǵyz operatorynyń kepildigimen salynatyn turǵyn úıdi satyp alýǵa ıpoteka resimdeı alady, dep habarlaıdy Egemen.kz.
Bastapqy naryq úshin turǵyn úı qunynyń eń joǵary lımıtteri Nur-Sultan, Almaty qalalarynda 25 mln teńgeden 35 mln teńgege deıin, sondaı-aq bastapqy jáne qaıtalama turǵyn úı úshin - Shymkent qalasynda 25 mln teńgege deıin jáne Qaraǵandy qalasynda 20 mln teńgege deıin ózgertildi.
«Baspana Hıt» baǵdarlamasynyń jańa talaptaryn birinshi bolyp Almaty qalasynyń turǵyny Láılá Anasova paıdalanyp kórdi.
«Kópten beri úıimizdi keńeıtý joldaryn izdegen edim. Biz otbasymyzben eki bólmeli páterde turdyq. Onyń kólemi nebári 50 sharshy metr. Biz úshin óte tar edi. Salynyp jatqan úıdiń daıyn úıge qaraǵanda arzan ekenin biletin edim. Biraq qurylys salýshynyń bólip tóleý talaptary maǵan qolaısyz boldy», deıdi L. Anasova.
Onyń aıtýy boıynsha, «Baspana Hıt» baǵdarlamasy boıynsha salynatyn turǵyn úıdi satyp alýǵa bolatyny týraly aqparatty áriptesinen estigen. Sol boıynsha jańalyqtardy oqyp, bilip júrdi. Baǵasy qymbat emes jáne ornalasqan jeri barynsha qolaıly, qurylystyń aıaqtalýyna kepildigi bar turǵyn úı keshenderin izdestire bastaǵan.
«Nátıjesinde SentrKredıt Bank akkredıttegen Qazaq Stroy qurylys kompanııasynan «Terracotta» turǵyn úı keshenin tańdadym. Zeınetaqy qorynan alynatyn qarajattyń esebinen ıpotekany jartylaı jabýǵa nıettimin. Qurylysshylar úıimizdi kelesi jyldyń kúzinde paıdalanýǵa berýge ýáde berip otyr», - deıdi Láılá.
«Qazaqstannyń ornyqtylyq qory» AQ basqarma tóraǵasynyń orynbasary Rústem Qydyqovtyń aıtýynsha, bankter qarjylyq turaqtylyǵyn tekserip, akkredıtasııadan ótkizgen qurylys kompanııalarynyń salynyp jatqan turǵyn úı nysandary «Baspana Hıt» baǵdarlamasyna qatysa alady.
«Baspana Hıt» baǵdarlamasynyń jańa talaptary turǵyn úıdiń qoljetimdiligin arttyrýǵa jáne bastapqy turǵyn úıge suranysty kóbeıtýge baǵyttalǵan. Jaqyn arada baǵdarlamanyń jańa talaptary boıynsha ıpotekalyq qaryzdar berýge basqa da bankter men akkredıttelgen qurylys salýshylar qosylady», - dedi Rústem Qydyqov.
Esterińizde bolsa, Qazaqstan Respýblıkasynyń Ulttyq Banki turǵyn úı naryǵynda uzaq merzimdi kredıtteýdi yntalandyrý maqsatynda «Baspana Hıt» ıpotekasyn 2018 jyly iske qosqan edi. Búgingi kúni 40 myńnan astam qazaqstandyq osy baǵdarlama boıynsha úıli boldy.