«Aıbyn» VI respýblıkalyq áskerı-patrıottyq jıynynda Túrkistan oblysynyń atynan qatysqan «Barys» áskerı-patrıottyq klýbynyń tárbıelenýshileri alǵys hattarmen jáne baǵaly syılyqtarmen marapattaldy, dep habarlaıdy Egemen.kz.
Oblystyń jas patrıottaryn qurmetteý rásimi Túrkistan qalasyndaǵy oblystyq jastar resýrstyq ortalyǵynda ótti. Is-sharaǵa Túrkistan oblysy ákimdiginiń, oblystyq qorǵanys isteri jónindegi departamentiniń, Qazaqstan Respýblıkasy Qarýly Kúshteri ardagerleriniń О́ńirlik keńesiniń ókilderi jáne jattyqtyrýshy-oqytýshylar qatysty.
«Dál osyndaı jarystar arqyly biz jastardyń azamattyq boryshyn jáne Otandy qorǵaý boıynsha konstıtýsııalyq mindetterin oryndaýǵa daıyndyǵy men praktıkalyq qabiletterin qalyptastyramyz. Qazir bizdiń aldymyzda Arys qalasynyń ártúrli mektepteriniń oqýshylary ǵana emes, kópti biletin jáne kóp nárseni úırengen uıymshyl ujym tur. Bul olardyń janynda únemi bolǵan jáne barlyq bastamalarynda qoldaý kórsetken jattyqtyrýshy-oqytýshylarynyń eńbegi. Osy jeńispen barlyq qatysýshylardy shyn júrekten quttyqtaımyn!» dedi oblystyq qorǵanys isteri jónindegi departament bastyǵynyń orynbasary, maıor Jandos Kúlderbaev.
Kýboktar, medaldar, dıplomdar jáne baǵaly syılyqtarmen marapattalǵan jas patrıottar, kórsetken qoldaýy men qamqorlyǵy úshin alǵystaryn bildirdi.
«Alda áli talaı shyńdardy baǵyndyrýymyz kerek. Bul rette biz ótken jıynda kórsetken nátıje boıynsha deńgeıdi únemi ustap turýǵa tıispiz. Biz tehnologııanyń qarqyndy damyp kele jatqan ǵasyrynda ómir súrip jatyrmyz. Biz óz patrıotızmimizdi is júzinde dáleldeı otyryp, elge paıda ákelý úshin barlyq jańalyqtardy ıgere úlgerýimiz kerek», dedi «Úzdik jas sarbaz» nomınasııasynyń jeńimpazy Ábdibek Qýanysh.
Aıta ketsek, bıyl «Aıbyn» áskerı-patrıottyq jastar jıyny alǵash ret onlaın rejımde ótti. Oǵan búkil Qazaqstannan 39 komanda qatysty. Olar áskerı-qoldanbaly sport túrleri boıynsha, zııatkerlik jáne shyǵarmashylyq konkýrstarda ózara saıysty.