Sybaılas jemqorlyqqa qarsy is-qımyl agenttiginiń tóraǵasy Alık Shpekbaev Italııanyń Sybaılas jemqorlyqqa qarsy is-qımyl Ulttyq basqarmasynyń prezıdenti Djýzeppe Býsııamen onlaın kezdesý ótkizdi, dep habarlaıdy Egemen.kz.
Sybaılas jemqorlyqqa qarsy kúres vedomstvosynyń basshysy ıtalıandyq áriptesterin elimizde júrgizilip jatqan keshendi reformalarmen tanystyryp, saıası transformasııanyń mańyzdylyǵyn atap ótti. Qazaqstannyń ólim jazasyn joıýǵa, Ákimshilik rásimdik-prosestik kodeksti qabyldaýǵa, jala jabýdy dekrımınalızasııalaýǵa jáne parlamentarızmdi kúsheıtýge baǵyttalǵan Azamattyq jáne saıası quqyqtar týraly halyqaralyq paktiniń fakýltatıvtik ekinshi hattamasyna qosylý máselelerine erekshe nazar aýdaryldy.
Ol sondaı-aq sybaılas jemqorlyqqa qarsy zańnamalyq bastamalardy iske asyrý máselelerine toqtaldy. Atap aıtqanda, sybaılas jemqorlyq úshin sottalǵandardyń merziminen buryn shartty túrde bosatylýyn boldyrmaý, sheteldik bankterdegi shottardy ıelenýge tyıym salý jáne quqyq qorǵaý organdary qyzmetkerleri men sýdıalardyń sybaılas jemqorlyq úshin jaýapkershiligin kúsheıtý bóliginde sońǵy novellalardy atap ótti.
О́z kezeginde Djýzeppe Býsııa Agenttiktiń júrgizip jatqan jumysyna oń baǵa berip, saıası erik-jiger men sońǵy 1,5 jylda qabyldanǵan serpindi sharalardy atap ótti.
Kezdesý barysynda sheteldik áriptester óz vedomstvosynyń Italııanyń quqyqtyq júıesindegi róli týraly aıtyp berdi. Bul organ sybaılas jemqorlyqtyń aldyn alýǵa baǵyttalǵan, onyń ishinde memlekettik organdardyń tıisti úsh jyldyq josparlardy oryndaýyn baqylaýdy júzege asyrady. Ol sondaı-aq múddeler qaqtyǵysy máselelerin retteý men habardar etýshilerdi qorǵaýdy jáne memlekettik organdar qyzmetinde ashyqtyq qaǵıdattaryn iske asyrýdy qosa alǵanda, memlekettik qyzmetshiler arasynda adaldyq mádenıetin ilgeriletýge jaýapty.
Italııanyń sybaılas jemqorlyqqa qarsy vedomstvosy memlekettik jáne kvazımemlekettik sektorlarda ótkiziletin Memlekettik satyp alýlardyń baǵa komplaensinen bastap qol qoıylǵan aktilerdi tekserýge deıingi tolyq sıklin baqylaý quqyǵyna ıe.
Eýrokomıssııa bıýdjet qarajatynyń shyǵystaryn baqylaýdyń úzdik quraly retinde tanyǵan Memlekettik kelisim-sharttardyń ulttyq tizilimi qyzyǵýshylyq týdyrady. Bul resýrsta sońǵy 13 jyldaǵy derekter saqtalǵan. Bul tereń retrospektıvti taldaý júrgizýge múmkindik beredi.
Kezdesý qorytyndysy boıynsha Taraptar qyzmetkerlerdiń quzyrettiligin arttyrý salasyndaǵy yntymaqtastyqty nyǵaıtýǵa, sondaı-aq qyzyqtyratyn taqyryptar boıynsha naqty keńester ótkizýge kelisti.