Keshe AQSh-tyń Florıda shtatynda ornalasqan Hard Rock Holly kazıno-qonaqúıinde ótken boks keshiniń basty jekpe-jeginde Qazaqstannyń maqtanyshy Gennadıı Golovkın Polshanyń myqtysy Kamıl Sheremetany merziminen buryn jeńip, orta salmaqta IBF jáne IBO nusqalary boıynsha álem chempıony ataǵyn sátti qorǵady.
31 jastaǵy Polsha boksshysy qazaq jankúıerlerine jaqsy tanys bolmasa da, qazaqstandyq boksshylarǵa esim-soıy 2010 jyldan beri belgili. Sol jyly Polshada jyl saıyn dástúrli túrde ótetin «Felıks Shtamm» týrnıriniń fınalynda Kamıl eki dúrkin álem chempıony bolyp turǵan otandasymyz Serik Sápıevten aılasyn asyryp, jarys jeńimpazy atanǵan. Bul – Sheremetanyń áýesqoı bokstaǵy eń tabysty jeńisi dep te aıtýǵa bolady. Budan bólek ol 2008 jyly Polsha chempıonatynyń qola júldegeri atanǵan.
2012 jyldyń sońynda boksshy kəsipqoılar arasynda kúsh synasýǵa bel býdy. Osy kúnge deıin 21 mərte rıngke kóterilip, 21 ret jeńiske jetti. 5 qarsylasyn merziminen buryn jeńgen. Byltyr qazan aıynda Sheremeta Golovkın men ýkraınalyq Sergeı Derevıanchenko arasynda ótken boks keshinde óner kórsetip, meksıkalyq Oskar Kortesti nokaýtpen jeńgen edi. Dál osy jeńisinen keıin ol Golovkınniń IBF beldigine mindetti qarsylas atandy. Eki boksshynyń arasyndaǵy jekpe-jek 2020 jyldyń basynda ótýi tıis bolatyn, alaıda túrli sebeppen aıqas birneshe ret keıinge shegerile berdi. Mine, boksshylar jyl aıaǵynda kezdesý ótkizip, jankúıerlerine tamasha tartys syılady.
Hard Rock Holly kazıno-qonaqúıindegi aıqasta mamandar áý bastan Golovkınniń jeńisine esh kúmán keltirgen joq. Áıgili boks sarapshylary bul jekpe-jek qazaqstandyq boksshy úshin kezekti bir aıqas aldyndaǵy sparrıng jattyǵý bolady degen pikirlerin de jasyryp qalmady. Árıne, polshalyq boksshy deńgeı jaǵynan otandasymyzdyń buǵan deıingi qarsylastary – Derevıanchenko, Djeıkobs, Alvarespen salystyrýǵa múlde kelmeıdi.
Dese de keshegi keshke Kamıl Sheremeta tas-túıin daıarlyqpen kelgeni birden baıqaldy. Ol ataǵy jer jarǵan Gennadıı Golovkınnen esh qaımyqpaı aıqasty deýge de bolatyn shyǵar. Tipti, alǵashqy raýndta birinshi nómirmen judyryqtasyp, ashyq aıqasqa barǵan Sheremeta raýnd sońynda Golovkınniń aýyr soqqysyna tap bolyp, nokdaýnǵa túsip qaldy. Jekpe-jekke deıin pikir bildirgen polshalyq boksshy Golovkınge qarsy aıqasta bir jyl burynǵy Derevıanchenkonyń taktıkasyn qoldanatynyn, sol jekpe-jekte ýkraınalyqtyń jeńiske jetkenin aıtqan bolatyn. Sergeıdiń taktıkasyn ustanamyn dep sharshy alańǵa shyqqan Sheremeta da Derevıanchenko sııaqty alǵashqy raýndta-aq nokdaýnǵa ushyrady.
Alaıda Sheremetanyń saǵy synǵan joq. Keıingi raýndtarda da ol Golovkınniń soqqylaryna toıtarys berip, qarsy shabýylǵa ıek artty. Biraq ekinshi raýndta da kóp soqqy ótkizip alǵan Kamıl taǵy da eseńgirep qaldy. Tek úshinshi raýndqa kelgende polshalyq boksshy Golovkınniń aýyr soqqylarynan sytylyp shyǵyp kete aldy. Al tórtinshi úsh mınýttyqta Sheremeta otandasymyzdyń serııalyq soqqylarynan keıin kezdesýdegi úshinshi nokdaýnyna ushyrady. Bundaı soqqylardan keıin Golovkınniń qarsylastary ádette jekpe-jekti jalǵastyrýdan bas tartyp jatatyn. Kamıl bulaı istegen joq. Besinshi jáne altynshy raýndta otandasymyzdyń qarqyny sál saıabyrsyǵanyn baıqaǵan Sheremeta endi ózi soqqy jasaýǵa tyrysty. Biraq onyń soqqylary Genaǵa esh qaýip týdyrǵan joq. Bylaısha aıtqanda, Golovkın onyń soqqylaryn shybyn shaqqan qurly kórmedi. Jekpe-jek bel ortasynan aýyp, jetinshi raýndqa kelgende Sheremeta taǵy da rıngtiń besinshi buryshyn izdep ketti. Bul joly Golovkınniń djeb soqqysy kózdegen jerge dál tıdi.
Jetinshi raýndtan keıin kezdesýdiń ári qaraı jalǵaspaıtyny belgili boldy. Raýnd aralyq úziliste polshalyq boksshynyń bapkerleri tóreshige jekpe-jekten bas tartatynyn aıtyp, Kamıl Sheremeta jeńilgenin resmı moıyndady.
Osylaısha, 38 jastaǵy jerlesimiz Gennadıı Golovkın IBF jəne IBO nusqalary boıynsha əlem chempıony ataǵyn sátti qorǵady. Bul – onyń kəsipqoı rıngtegi 41-shi jeńisi. 36 bəsekeni GGG nokaýtpen aıaqtady. Bir ret utylyp, taǵy bir jekpe-jekte teń esep tirkeldi. Sonymen qatar álem chempıony ataǵyn qorǵaý jaǵynan rekord jańartyp (21 márte), kásipqoı boks tarıhyna óz esimin taǵy bir ret altyn áriptermen jazdyrdy. Buǵan deıingi rekord Bernard Hopkınske tıesili bolatyn. Ol óz ataǵyn 20 ret qorǵaǵan edi.
Compubox saıty usynǵan statıstıkalyq məlimetke júginsek, osy aıqas barysynda Golovkın 554 soqqy jumsap, sonyń 228-i qarsylasyna dəl tıdi. Bul – 41 paıyzdyq kórsetkish! Sheremeta 317 ret judyryǵyn dál siltegen eken. Sonyń 94-i nətıjeli boldy. Bul – 18 paıyzdyq kórsetkish!
Jekpe-jekten keıin pikir bildirgen Gennadıı Golovkın barsha qazaqstandyqtardy Táýelsizdik merekesimen quttyqtap, aldaǵy josparyn ortaǵa saldy. «Eń áýeli otandastarymyzdy Táýelsizdik kúnimen shyn júrekten quttyqtaımyn. Biz birgemiz – myqtymyz. Jekpe-jekke keler bolsaq, búgin jeńiske jetkenime jáne sharshy alańǵa qaıta oralǵanyma óte qýanyshtymyn. Sheremeta maǵan tosyn syı bolǵan joq, óıtkeni onyń deńgeıi áýelden-aq belgili edi. Men rıngte ózimdi jaıly sezindim. Kamıl Sheremeta jáne onyń komandasyna óz alǵysymdy bildiremin. Jekpe-jekti bastapqy raýndtarda-aq aıaqtap tastaýyma bolar edi. Biraq jekpe-jegimdi taǵatsyzdana kútken jankúıerlerime keremet boks shoýyn usynǵym keldi.
Kelesi jekpe-jegim kimmen ótýi múmkin?! Men kez kelgen qarsylastyń usynysyn qarastyrýǵa daıynmyn. Sonyń ishinde «Kanelo» men Smıt jekpe-jeginiń jeńimpazymen de jolyqqym keledi», dedi Golovkın.
Aıta keteıik, osy boks keshinde judyryqtasqan taǵy bir jerlesimiz Əlı Ahmedov ekvadorlyq Karlos Gongormen IBO tujyrymy boıynsha álem chempıony ataǵy úshin judyryqtasyp, nokaýtpen jeńilip qaldy. 12 raýndqa deıin jerlesimiz upaı sany boıynsha alda kele jatqan. Alaıda sońǵy raýndta qarsylastyń aýyr soqqysyn ótkizip alǵannan keıin jekpe-jekti jalǵastyra almady.