Tártip saqshylary qylqan japyraqty aǵashtardy zańsyz kesýshilerge qarsy kúresti bastady. Jas qylqan japyraqty aǵashtardy zańsyz kesý, daıyndaý, tasymaldaý jáne satýdyń aldyn alý maqsatynda polısııa qyzmetkerleri "Shyrsha" jedel aldyn alý is-sharasyn uıymdastyryp otyr, dep habarlaıdy Egemen.kz
– Polıseıler oblys aýmaǵynda qylqan japyraqty aǵashtardy zańsyz kesý, sondaı-aq olardy saýdalaý, bazarlarda jáne basqa jerlerde zańsyz satý derekterin boldyrmaýǵa erekshe nazar aýdarady. Oblys aýmaǵynda polısııa men tabıǵatty qorǵaý organdary esebinen qurylǵan mobıldik toptar táýlik boıy jas qylqan japyraqty aǵashtardy zańsyz kesý faktileriniń jolyn kesý boıynsha reıdterdi júzege asyrýda, – dep túıindedi Jergilikti polısııa qyzmeti basqarmasynyń bastyǵy Baǵdat Áshimov.
Polısııa qyzmetkerleri joldar men beketterdegi polısııa jasaqtarynyń baqylaýyn kúsheıtip, qylqan japyraqty aǵashtardy tasymaldaý men satýdyń zańdylyǵyn tekserýde. Tasymaldanýshy árbir qylqan japyraqtynyń qaıda óskeni, kimniń satqany jáne qaıda apara jatqanyn anyqtaýǵa nıetti.
– Máselen, Tekeli qalasynyń mańynda 35 jastaǵy turǵyn birneshe shyrshany kesip tastaǵan. Sondaı-aq, qylqan japyraqty aǵashtardy zańsyz satý faktisi Almaty-Bishkek tas jolynyń 19 shaqyrymynda tirkeldi. “Shyrsha” jedel-aldyn alý is-sharasy Jańa jyl qarsańynda bastalyp, osy jyldyń 31 jeltoqsanyna deıin jalǵasady, – dep tolyqtyrdy Baǵdat Áshimov.