Ishki ister mınıstri Erlan Turǵymbaev Maqan Esbolatov atyndaǵy Almaty akademııasyna bardy, dep habarlaıdy Egemen.kz.
Polisia.kz saıtynyń aqparatyna sáıkes, bul oqý ornynda kýrsanttyń qaza bolýyna baılanysty keshendi tekserý júrgizilip jatyr. Mınıstrge tekserýdiń aldyn ala nátıjeleri týraly arnaıy toptyń basshysy – IIM Kadr saıasaty departamentiniń bastyǵy Aıdar Saıtbekov baıandady.
Ol óz sózinde oqý ornynyń tek qana turmystyq jaǵdaıy, materıaldyq-tehnıkalyq jabdyqtalýy ǵana emes, oqytýshylar men kýrsanttar arasyndaǵy moraldyq-psıhologııalyq ahýal da zerttelip jatqanyn aıty ótti. Onyń aıtýynsha, qazirgi ýaqytta júıeli túrde zańsyz aqsha jınaý faktileri rastalmaǵan. Degenmen, kýrsanttardyń týystarynyń oqý ornyndaǵy yqtımal qysym kórsetýshilik týraly habarlamalary da muqııat zerttelýde.
«Stýdentter arasynda áleýmettik-psıhologııalyq zertteý júrgizý barysynda ózine qol jumsaǵan kýrsanttyń ártúrli syltaýlarmen týystarynan únemi aqsha suraıtyndyǵy anyqtaldy. Ol sondaı-aq ózge kýrsanttardan qaryzǵa aqsha alyp, onyń kópshiligin qaıtarmaǵan. Kýrsanttardyń aıtýy boıynsha, sońǵy kezde qaza tapqan kýrsant ınternet-kazıno men býkmekerlik keńselerge salymdar salýmen aınalysqan. Kýrsant Salamat О́tegenov týysqandary men tanystarynan túrli somalardy osy maqsatqa alyp otyrdy ma degen boljam bar. Sonymen qatar, qylmystyq isti tergeý aıasynda bolǵan oqıǵanyń barlyq nusqalary tekserilýde», dep baıandady Ishki ister mınıstrine Aıdar Saıtbekov.
Oqý ornyn aralaý barysynda Erlan Turǵymbaev oqý úderisin uıymdastyrý máselelerimen, sondaı-aq kýrsanttardyń kazarmada turý jaǵdaıymen tanysty. Mınıstr sondaı-aq akademııanyń oqytýshylarymen, kýrsanttarymen jáne kýrsanttardyń ata-analarymen kezdesti. IIM basshysy jaqyn arada jańa basshylyq taǵaıyndalatynyn, onyń basty mindeti – kýrsanttardyń tártip deńgeıi men kásibı daıarlyǵyn arttyrý ekenin atap ótti.