23 qańtarda Birikken Arab ámirliginiń Ábý-Dabı qalasynda aralas jekpe-jekten ótetin týrnırde kimderdiń aıqas alańyna shyǵatyny tolyqtaı anyqtaldy, dep habarlaıdy Egemen.kz.
Bul jarystyń basty jekpe-jeginde Konor Makgregor men Dastın Pýare kúsh synasady. 32 jastaǵy Irlandııanyń ókili 2008 jyldan beri osy sport túrin serik etýde. Sol kezden beri 26 márte oktagonǵa shyqqan ol 22 ret jeńiske jetip, 20 básekeni merziminen buryn aıaqtady. Sońǵy kezdesýin Makgregor 2020 jyldyń 18 qańtarynda Donald Serronege qarsy ótkizip, barlyq «máseleni» 41 sekýndta sheshti.
Al 31 jastaǵy AQSh sportshysy tusaýkeser kezdesýin 2009 jyly ótkizdi. Kúni búginge deıin 32 ret aıqasqan Pýareniń 26 márte mereıi ústem boldy. 19 qarsylasyn ol esinen tandyrdy.
Sondaı-aq, Ábý-Dabıde Qazaqstannyń qos sportshysy jarys kórigin qyzdyrady. Olar – Jalǵas Jumaǵulov pen Sergeı Morozov. Jalǵas shvesııalyq Ámir Albazımen aıqassa, Sergeı reseılik Omar Nurmagomedovpen kúsh synasady.