2020 jyldyń sońyna deıin elimizde jeke tulǵalar úshin salyqtyq raqymshylyq jasalady.
Almaty qalalyq Memlekettik kirister departamentiniń derekteri boıynsha, qala boıynsha ósimpuldardy esepten shyǵarýda aksııanyń basynda boryshkerler sany 192 myń jeke tulǵany qurady, onda 6,5 mlrd teńgeden astam bereshek, onyń ishinde negizgi qaryz somasy — 5,4 mlrd teńge jáne ósimpul — 1,1 mlrd teńge boldy.
Búgingi kúni Almaty qalasynda raqymshylyqty 97 141 salyq tóleýshi paıdalandy, onda 245 mln teńge somasyna ósimpul esepten shyǵaryldy jáne negizgi ótelgen borysh somasy 2,1 mlrd teńgeni quraıdy. Bul rette ósimpuldy esepten shyǵarý avtomatty túrde júrgiziledi, boryshtyń negizgi somasyn ǵana tóleý jetkilikti.
Osy sharaǵa qatysty almatylyqtar óz oılarymen bólisti.
Mysaly, Lıýbov Pogorelova raqymshylyqtyń jyljymaıtyn múlikke qoıylǵan shekteýdi alyp tastaýǵa múmkindik bergenin atap ótti.
«Meniń bankte kepilde turǵan avtokóligime kólik salyǵy salyndy. Men osy jeńildikti paıdalandym, sol úshin de ony jyl sońyna deıin sozyp bergenine qýanyshtymyn. Bul qıyn jaǵdaıda qalǵan tulǵalar úshin úlken kómek bolyp otyr»,- deıdi ol.
Almatynyń taǵy bir turǵyny Olga Jarkova atalǵan qyzmettiń yńǵaıly ári jedel ekendigin atap ótti.
«Bul yńǵaıly, tez, artyq qujat jınaýdy qajet etpeıdi, jaı ǵana qaryzdy tólegende, ósimpul avtomatty túrde esepten shyǵarylady. Yńǵaılylyǵy, eshqaıda barýdyń qajeti joq ekendiginde. Barlyǵyn onlaın rejımde, kez-kelgen banktiń qyzmetteri arqyly jasaýǵa bolady. Búgingi kúni ózekti bolyp otyrǵandaı, eshqaıda barmaısyz, eshkimmen baılanys jasamaısyz, biraq prosestiń ózi óte jyldam. Qaryzy jınalyp qalǵandar bolsa, osy múmkindikti paıdalanyp qalý kerek», - dedi ol.
Departamenttiń derekteri boıynsha, 2020 jylǵy 1 sáýirdegi jaǵdaı boıynsha salyq tóleýshilerdiń derbes shottarynda esepte turǵan múlik, jer jáne kólik quraldary salyǵy boıynsha bereshek 2020 jylǵy 31 jeltoqsanǵa deıin tólengen jaǵdaıda, jeke tulǵalardyń ósimaqylary keshiriledi. Bul rette ósimpul bereshegi tólengen salyq túri boıynsha ǵana keshiriledi.
Bul norma mundaı adamdardyń salyq mindettemeleri kásipkerlik qyzmetti, jekeshe notarıýstyń, jeke sot oryndaýshysynyń, advokattyń nemese kásibı medıatordyń qyzmetin júzege asyrýmen baılanysty emes jaǵdaılardy qospaǵanda, jeke kásipker retinde tirkeý esebinde turǵan adamdarǵa jáne jeke praktıkamen aınalysatyn adamdarǵa qoldanylmaıdy.
Barlyq týyndaǵan suraqtar boıynsha azamattar Almaty qalasy boıynsha memlekettik kirister Departamentiniń koll-ortalyǵyna 1414 telefony boıynsha júgine alady