Memleket basshysy Qasym-Jomart Toqaev «Táýelsizdik bárinen qymbat» atty «Egemen Qazaqstan» gazetine jarııalanǵan maqalasynda sońǵy kezde qazaqstandyqtardyń el ómirine belsendi aralasýǵa, sheshim qabyldaý úderisine qatysýǵa yntasy artyp kele jatqanyn keńinen aıtyp ótti, - dep habarlaıdy Egemen.kz
«Meniń «Halyq únine qulaq asatyn memleket» tujyrymdamam jáne Ulttyq qoǵamdyq senim keńesi – osy suranysqa tikeleı jaýap. Ony Ordabasydaǵy, Kúltóbedegi, Ulytaýdaǵy uly jıyndardyń zamanaýı úlgisi deýge bolady. Biz qazaqtyń qanyna sińgen qasıet – keleli isti aqyldasyp birge sheshý dástúrin jalǵastyra beremiz. Bul bastamalar azamattyq qoǵamdy damytýǵa negiz bolady. Qazirgi sharalar aıaq astynan májbúrlikten qolǵa alynǵan joq. Ol – elimizdi demokratııalandyrýǵa, saıası júıeni jańǵyrtýǵa baǵyttalǵan saıasattyń jemisi», - deıdi Prezıdent.
Osy turǵyda Prezıdent saıası reforma bir kúnniń nemese bir jyldyń sharýasy emes ekenin jáne el irgesin shaıqaltpaı, bereke-birligin buzbaı, baıyppen jáne birtindep iske asyrýymyz kerektigin basa aıtty.
«Biraq, reformany soza berýge de bolmaıdy. Bılik halyqtyń aldyndaǵy óz jaýapkershiligin sezingeni jón. Sol sebepti biz aýyl jáne kent ákimderin saılaýǵa kóshemiz. Osy arqyly eń tómengi deńgeıden bastap jergilikti ózin ózi basqarý júıesin nyǵaıtamyz. Bul qadam ózekti máselelerdi turǵyndar men jergilikti bıliktiń birlesip sheshýi úshin qajet. Sodan keıin aýdan ákimderin saılaımyz. Jańa júıe óziniń tıimdiligin kórsetse, budan da joǵary deńgeıdegi ákimderdi saılaıtyn bolamyz. Biraq, saıası jańǵyrý barysynda asyǵystyqqa boı aldyrýǵa jáne jalań uranǵa erip, memlekettik júıeni daǵdarysqa ushyratýǵa bolmaıdy. Bir sátte barlyǵyn túbirimen ózgertý nege ákep soqtyratynyn keıbir elderdiń búgingi ahýalynan kórip otyrmyz», - deıdi Memleket basshysy.
El Prezıdenti Qasym-Jomart Toqaev elimizde, eń aldymen, adamnyń quqyǵyn tolyǵymen saqtaýǵa negizdelgen zań men tártip bolýy kerektigin, áıtpese, anarhııa men júgensizdik jaqsylyqqa aparmaıtynyn alǵa tartady.