Memleket basshysy Qasym-Jomart Toqaev «Egemen Qazaqstan» gazetinde jarııalanǵan «Táýelsizdik bárinen qymbat» atty maqalasynda óskeleń urpaq qasterli Táýelsizdigimizdiń qadirin jete túsinýi tıis ekenin aıtty, dep habarlaıdy Egemen.kz.
«Búginde Táýelsizdik qurdastary oıy tolysqan otyz jasqa toldy. Egemen elde dúnıege kelip, ósip-jetilgen olardyń sanasy sergek, kózqarastary da, ómir salttary da ózgeshe. Tipti, Táýelsizdikti eshbir dáleldi qajet etpeıtin aksıoma dep biledi. Bul – egemendik uǵymy jastardyń sanasyna berik ornyqqanyn kórsetetin qalypty qubylys. Biraq Táýelsizdik qundylyǵy jadyna birjola shegelenip, máńgi saqtalýy úshin óskeleń urpaq onyń qadirin bilýi kerek», dep jazdy Qasym-Jomart Toqaev.