Túrkistan qalasyndaǵy ákimshilik - iskerlik ortalyǵynda sporttyq keshenderi bar eskek esý kanaly salynady. Halyqaralyq talaptarǵa saı olımpıadalyq ortalyq óńirde qolaıly mıkroklımat qalyptastyryp, týrızmdi damytýǵa sep bolmaq, dep habarlaıdy Egemen.kz.
Oblys ákimi О́mirzaq Shókeev sý kesheniniń jańa bastalǵan qurylys alańynda boldy. Eskek esý jəne baıdarka sporty boıynsha olımpıadalyq standartqa saı ortalyq 100 gektarǵa jýyq alańda ornalasady. Kanaldyń jalpy uzyndyǵy – 2222, eni – 260, tereńdigi 4 metr. Tolyq saraptaý júrgizilip, konsepsııalyq joba ázirlengen. Sport keshende qonaqúı, velojolaq, basseın, ellıng, kanoege arnalǵan pırster, kórermenderge arnalǵan tablo, trıbýnalar, araldardy qosatyn kópir jáne taǵy basqa nysandar ornalasady.
Sonymen qatar oblys ákimi drama teatrynyń, oblystyq ǵylymı-ámbebap kitaphananyń, 6,7 jáne 8 qabatty 14 turǵyn úıdiń, eki dańǵyldy qosatyn jańa kópirdiń jobalarymen tanysty. Jumys barysyn baıandaǵan jaýapty merdigerlerge naqty tapsyrmalar berip, jobalarǵa ózgerister engizdi. Qala irgesinde ornalasqan dendrobaqta, ıaǵnı 27 gektar jasyl aýmaqta san túrli jemis aǵashtary men kópjyldyq ósimdik túrleri ósiriledi. Akasııa, talshyn, katalpa, eldar qaraǵaıy, qara jáne qyrym qaraǵaılary, shynar syndy 12 000 aǵash túri egilýde. О́mirzaq Estaıuly egiletin kóshet sanyn kóbeıtip, jasandy kóldiń kólemin úlkeıtýdi tapsyrdy. Sondaı - aq, oblys ákimi "Kerýen saraı" kesheninde boldy. Investısııalyq joba aldaǵy naýryz aıynda tolyq aıaqtalyp, el ıgiligine berilmek.