Megapolıs ákimi B. Saǵyntaev Instagram-daǵy óziniń paraqshasynda Almaty taýlarynda týrısterdiń qaýipsizdigin qamtamasyz etý úshin baqylaý-qutqarý pýnktteriniń ashylatynyn jáne taý soqpaqtaryn abattandyrý jumystarynyń jalǵasatynyn habarlady.
«О́ziniń tańǵajaıyp tabıǵatymen máshhúr Ile Alataýynyń taýlary almatylyqtar men qala qonaqtary úshin kórikti ári tartymdy mekenniń biri. Bul rette taýda qaýipsizdik sharalaryn saqtaǵan jón. Biz óz kezegimizde osyndaı joryqtardyń qaýipsizdigin qamtamasyz etý úshin ınfraqurylymdy jaqsartý boıynsha jumystardy qolǵa aldyq», - dep atap ótti B. Saǵyntaev.
Onyń aıtýynsha, Almatynyń taý klasterin damytý aıasynda myń shaqyrymnan astam taý baǵyttary sıfrlandyryldy, onyń ishinde jalpy uzyndyǵy 500 shaqyrym bolatyn 36 baǵyt abattandyryldy.
«Qazirdiń ózinde myń shaqyrymnan astam taý marshrýttaryn sıfrladyq, onyń jalpy uzyndyǵy 500 shaqyrym bolatyn 36-sy abattandyryldy. Marshrýttardyń shemasy men onyń kúrdeliligi kórsetilgen aqparattyq stendter ornatyldy. 2021 jyly 120 shaqyrymǵa jetetin taý joly abattandyrylmaq. Kishi jáne Úlken Almaty shatqalynda eki baqylaý-qutqarý pýnktiniń qurylysy qarastyrylǵan. 16 taý qutqarýshysy táýlik boıy kezekshilik etedi», - dep jazdy B. Saǵyntaev.
Megapolıs ákimi shalǵaı ornalasqan 14 toraptyq ýchaskelerde týrısterdiń kúrdeli aýa raıy jaǵdaılaryn kúte alatyn arnaıy qorǵaný oryndarynyń uıymdastyrylatynyn atady.
«Shalǵaıda ornalasqan 14 toraptyq ýchaskede kúrdeli aýa raıy jaǵdaılaryn kútýge bolatyn panalaý oryndaryn uıymdastyramyz. «Tuıyq sý» shatqalynda tikushaq alańyn qurý josparda bar. Túrli núktelerde dabyl túımeleri bar 10 radıorelelik dińgekterdi ornatý jáne «Tau Go» smart-navıgator qosymshasyn ázirleý kózdelgen», - dep atap ótti qala ákimi B. Saǵyntaev.
«Shymbulaq» TK vızıt-ortalyqtarynyń bazasyndaǵy jáne «Medeýdiń» bazalyq stansasyndaǵy taý betkeılerinde saqtyq erejelerin kúsheıtý úshin taýǵa shyǵar aldyndaturaqty túrde nusqaýlyqtar ótkiziledi, ekskýrsııa júrgizetin kásibı gıdtarmen birge saıahattar uıymdastyrylady.