Ult aldyndaǵy jańa mindet

«...Keler urpaqqa qandaı eldi amanattaımyz?», «Memle­ket­tigimizdi nyǵaıta túsý úshin taǵy ne isteımiz?» degen saýaldar Pre­zıdentti mazalaıtynyn bilemiz.

Halyqaralyq jaǵdaıda aldyna jan salmaıtyn tereń saıasatker Qasym-Jomart Kemeluly Toqaevtaı tulǵany mazalaıtyn oı kóp bolar. Odan shyǵar joldy tabatynyna da bek senemin. Qazir memleketter arasyndaǵy til tabyspaý qarapaıym halyqty baqytsyzdyqqa aparyp jatqanyn bilemiz. Ár memleketpen til tabysý úshin sol memlekettiń tilin, tarıhyn, minezin biletin bilimdilik qajet. Al bul jaǵynan kelgende mundaı basshy damyǵan  elderde de kóp emes. Bizdiń elimiz eń qıyn jaǵdaılarda táýelsizdiktiń týyn berik ustady.

Maqalada otyz jylda Elba­symyzben birge qandaı jetis­tikterge jetkenimizdi, endi mem­le­kettigimizdi nyǵaıta túsý úshin ne jasaý kerektigimizge toq­talǵan eken. Aıtylǵan oıy da, aldaǵy ustanym-baǵyttary da  kóńilimnen shyqty. Memleket aldyna da, ulttyń aldyna da jańa mindet pen jaýapkershilik júktelip otyr. Ásirese shetelde bilim alyp, óz talanttarymen alpaýyt kompanııalarda  jumys istep júrgen qazaqtyń talapty ul-qyzdaryn kózden de, kóńilden de tasa qylmaı, eldiń maqsatyna, memlekettiń damýyna olardyń da atsalysyp eńbek etýine múmkindik jasaımyn degeni unady. «...Jyraqta júrgen jastarymyzdan aıyrylyp qalamyz dep ýaıymdaýdyń jóni joq. Bizdiń mindetimiz – olardyń boıyna memleketshildik rýhyn sińirip, qaı jerde júrse de týǵan eldiń ıgiligine qyzmet etýge jumyldyrý. Mysaly, álemniń eń damyǵan elderinde óz kásipterin bastaǵan jáne alpaýyt kompanııalarda jumys istep júrgen azamattarymyzdyń osyndaǵy zamandastarymen baılanysyn nyǵaıtyp, tálimgerlik etýine jaǵ­daı jasaýymyz kerek», depti el Prezıdenti.

Qasym-Jomart Kemeluly 16 jasynda Máskeýge oqýǵa ketip, 40 jasynda eline oraldy. Búkil bilimin, kúsh-jigerin, jınaǵan tájirıbesin táýelsiz Qazaqstannyń damýyna arnap, sol jolda bar jigerin jumsap, El­basymen birge adal eńbek etke­nin bilemiz.  Kórshi elder  odaq­tyń kezinde-aq jer men sýǵa daý týǵyzyp otyratyn. Al qazirgi jaǵdaıda kóptegen máseleniń tatý túrde ońtaıyn taýyp, ult úshin durys sheshim qabyldap, ózara kelisimmen til tabysyp otyrý da ońaı emes.

Men Memleket basshysynyń ár qadamyn, halyqqa jasap jatqan mol múmkinshiligin kórip, tyńdap, oqyp otyramyn. Prezıdentimiz «Táýelsizdik bárinen qymbat» dep otyr. Táýelsiz elimizdiń máńgilik el bolýyna  bárimiz aralasýymyz kerek dep oılaımyn. Meniń ata-anamnan keıingi eki ustazym boldy. Biri – ómir jolynyń qıyndyǵyna tózgen, soǵysty bastan keshken, taǵ­­dyrynyń aýyrtpalyǵyna moıy­maǵan, otanshyl, detektıv janrynyń negizin qalaýshy Kemel aǵa Toqaev edi. Ekinshisi – qazaq ádebıetiniń kórnekti klas­sıgi Ǵabıt aǵa Músirepov bolatyn. Osy eki alyp tulǵadan kóp úırendim, tálim tárbıelerin kór­dim. Meni tárbıelegen, maǵan  áke bolǵan uly tulǵalar edi.

Men qazirgi Prezıdenttiń saıa­sat­kerligimen qosa, onyń kez kelgen álemdik trıbýnalarda óz hal­qynyń múddesin taptatýǵa jol bermeıtin ójettigine, sheshen­digine qaıran qalyp otyramyn. Aman bolsyn!!!

Ákim TARAZI,

jazýshy, dramatýrg, Memlekettik syılyqtyń laýreaty