Memleket basshysy Qasym-Jomart Toqaevtyń «Egemen Qazaqstan» gazetinde jarııalanǵan «Táýelsizdik bárinen qymbat» atty maqalasy bolashaqqa baǵdar beredi.
Sonda aıtylǵan oılardyń ishinde erekshe kóńilge qonǵany – Prezıdenttiń azamattyq qoǵamdy qalyptastyrýǵa jáne damytýǵa negiz bolatyn bastamalary týraly sózi. Saıası reformalarsyz ekonomıkany damyta almaıtynymyzǵa kózimiz jetti. Desek te saıası reforma, Memleket basshysy aıtqandaı, bir kúnniń nemese bir jyldyń sharýasy emes. Bizge qoǵamnyń túrli kózqarasyn jetkizip, ártúrli problemany sheshýge muryndyq bolatyn partııalar kerek. Kóppartııaly júıe osyǵan alyp keledi. Bir partııa bıliktiki bolsa, bir partııa halyqtyń sózin sóıleýi tıis.
Shyn máninde, bizdiń táýelsizdik jolyndaǵy tarıhymyz beriden bastalmaıdy, bul myńjyldyqtarǵa ulasady. Jasyratyny joq, sol tarıh umytylyp ketti. Mine, osyndaı mańyzdy máselege Prezıdent tereńnen toqtaldy. Biz azattyq jolyndaǵy tarıhymyzdy bilip, ony keńinen túsiný arqyly egemendiktiń qanshalyqty qundy ekenin jete uǵyna alamyz. Halyqqa, óskeleń urpaqqa egemendik jolyndaǵy tereń tarıhymyzdy túrli kıno ónimderimen jetkizý arqyly ulttyq rýhymyzdy kóteremiz. Ulttyq rýhy bıik halyq máńgi jasaıdy, tek damı beredi.
Prezıdent óz maqalasynda ekologııaǵa qatysty da tolymdy sózder aıtty. Osyǵan qoǵamdyq qyzmet turǵysynan qarasam, munda jahandyq oı jatyr. О́ıtkeni qazirgi álemdik tendensııa – qorshaǵan ortany qorǵaý, aınalany lastamaý, aǵash otyrǵyzý. Memleket basshysynyń dál osy baǵytqa qoǵamdy tárbıeleý, baýlý kerektigi týraly oıyna tolyq qosylamyn. Biz osy planetanyń turǵyny, onyń qorǵaýshysy, erteńge amanattaýshy ekenimizdi uǵynýymyz kerek. Bul – týǵan jerge degen súıispenshilikten bastalatyn keń aýqymdy, jahandyq deńgeıde oılaı alatyn adamnyń isi.
Azamathan SAILAÝULY,
«Baıtaq bolashaq» ekologııalyq qozǵalysynyń tóraǵasy